KRALENDIJK – Turismo na Hulanda Karibense a mustra un rekuperashon den 2021. Esei tabata notabel den e kantidat di bishitante ku a yega Saba i Sint Eustatius ku avion. E kantidat di bishitante pa Boneiru, di 44 mil den e di kuater kuartal, a te asta surpasá esun di e mesun kuartal di 2019. Esaki ta resultá for di e último sifranan di CBS.

Den e di kuater kuartal di 2021, 44 mil bishitante a yega Boneiru ku avion, 10 porshento mas ku den e periodo komparabel di 2019. Den e di tres kuartal di aña pasá, e kantidat di bishitante tabata bèk riba e nivel bieu di promé ku e krísis di corona. Den henter 2021, 111 mil bishitante a yega Boneiru ku avion, 70 porshento di e kantidat di bishitante ku a yega e isla ku avion den 2019.

E proporshon di bishitante di Hulanda Oropeo na Boneiru a sigui oumentá

E proporshon di bishitante di Hulanda Oropeo ku a bin Boneiru, a subi di 35 porshento den 2019 pa 55 porshento den 2021. E proporshon di bishitante di Aruba, Kòrsou i St. Maarten a baha di 22 porshento den 2019 pa 15 porshento den 2021. E proporshon di bishitante merikano tambe a baha, di 25 porshento den 2019 pa 16 porshento den 2021.

Bishita di pasahero krusero ta rekuperando

Banda di turismo ku ta yega ku avion tin tambe bishitante ku ta yega ku barku krusero. Despues ku meimei di mart 2020 a introdusí medidanan di corona pa Boneiru, tráfiko krusero a para. Ta entrante sèptèmber 2021 numa barku krusero a bolbe bishitá haf di Boneiru. Miéntras ku na novèmber i desèmber 2019 susesivamente alrededor di 52 mil i 68 mil pasahero a bin Boneiru via barku krusero, esakinan tabata den e mesun lunanan di 2021 djis alrededor di 18 mil i 35 mil pasahero. Promé ku e brote di e pandemia di corona, mayoria pasahero krusero a yega Boneiru den novèmber, desèmber, yanüari i febrüari.

Rekuperashon di turismo ku ta yega Saba ku avion ta kontinuá

Den e di kuater kuartal di 2021, alrededor di 1400 bishitante a yega Saba ku avion. Esei ta un oumentu di 9 porshento kompará ku e kuartal anterior. Ounke e liña kresiente a kontinuá pues den e di kuater kuartal, ainda e kantidat di bishitante tabata solamente 61 porshento di e mesun periodo di 2019 (2200 bishitante).

En total alrededor di 4 mil bishitante a yega Saba den 2021. Esei ta mas ku den 2020 tempu ku solamente 2700 bishitante a yega, pero te ainda e ta 56 porshento ménos ku promé ku e krísis di corona.

Atrobe mas bishitante pa Sint Eustatius

Den e di kuater kuartal di 2021, kasi 1200 bishitante a yega Sint Eustatius ku avion. Esei ta solamente 45 porshento di e kantidat ku den e mes periodo di 2019 a bishitá e isla.

Pa Sint Eustatius ta konta, meskos ku pa Saba, ku e kantidat di turista ku a yega e isla ku avion ta sigui oumentá, pero ainda no ta riba e nivel promé ku e krísis di corona. En total 3600 bishitante a yega Sint Eustatius aña pasá, miéntras ku esaki tabata kasi 11 mil den 2019. E kantidat di bishitante den 2021 ta nèt algu mas ku un aña anterior, tempu ku tabatin 3200 bishitante, di kua mas òf ménos dos terser parti den e promé kuartal.

Fuentenan:

StatLine – Caribisch NL: inkomend toerisme per vliegtuig https://www.cbs.nl/nl-nl/cijfers/detail/83104NED

StatLine – Caribisch NL: inkomend toerisme per vliegtuig; nationaliteit https://www.cbs.nl/nl-nl/cijfers/detail/83191NED

StatLine – Caribisch Nederland, Bonaire; cruisepassagiers https://www.cbs.nl/nl-nl/cijfers/detail/85007NED