Un kaluroso bon bini na buelonan direkto di Merka

Kralendijk – Djasabra ku a pasa, Boneiru a yama bon bini na buelonan direkto di Merka ku American Airlines i Delta Airlines for di Miami i Atlanta, respektivamente markando un era importante pa nos isla. 

Despues di un temporada di 15 luna sin operashon dor di e pandemia, e dos aerolíneanan a resumí nan buelonan pa Boneiru riba djasabra i djárason. Esaki ta un bon notisia pa e ekonomia di Boneiru, nos bishitantenan di Merka ku tabata anhelá pa bishitá Boneiru, pa nos sektor turístiko i tambe henter nos komunidat ku tabata anhelá pa nan yegada. 

Tourism Corporation Bonaire (TCB) a enkurasha partnernan lokal pa forma parti di e evento ku un toke kultural i úniko pa asina kolaborá ku un regalo pa e bishitantenan. TCB a prepará e evento kultural na aeropuerto i komo aktrakshon a pone algun peluche di entre otro flamingo, turtuga, yuana i buriku riba e bant di ekipahe ku regalo den forma di ‘voucher’ di e diferente partnernan ku a kooperá. E pasaheronan por a piki e peluche komo un regalo di parti di Boneiru.

Na salida por a topa un ambiente kultural ku musika di kaha di òrgel i Donnie i Monique ku trahe folklor pa entretené e pasaheronan ku a kaba di yega Boneiru. Tambe TCB a entregá kada pasahero un tas ku varios artíkulo di promoshon i regalo aden. Esaki a wòrdu entregá pa e aktual Miss Tourism Bonaire i e di dos finalista di Miss Tourism Bonaire, tambe bisti den trahe folklor.

Por a mira e emoshon riba e kara di e bishitantenan na momentu ku nan a keda sorpresá dor di e evento i e publiko yamandó nan bon bini, lokualsigur a hasi un impakto i lo keda graba den nan memoria. Varios di e bishitantenan a tuma tempu pa kapturá e momentu.  

TCB ta yama DANKI na kada un di e partnernan ku a kolaborá ku nan regalo pa nos bishitantenan; Belmar Oceanfront Apartments, The Bellafonte – Luxury Oceanfront Hotel, Blennies, Bonaire Destination Services, Bonaire Kiteschool, Bonaire Landsailing Adventures, Bonaire Tours & Vacations, BonTapa, Bottles, Brass Boer, Buddy Dive Resort, Budget Car Rental, The Cadushy Distillery, Coral Casino, Cuba Compagnie, Daily Fresh, Delfins Beach Resort, Divi Flamigo Beach Resort & Casino, Epic Tours, Gio’s, Hitess N.V., Ingridiënts Restaurant, It Rains Fishes, Karel’s Beach Bar, Luciano’s, Melissa Sailing, STINAPA, Tropical Nature, Ocean Oasis Beach Club, Patagonia Restaurant, Van der Valk Plaza Beach Resort, Salty Tours, Sebastian’s Restaurant, Bar & Lounge, Tiki & Co, Tulip Spa, The Touch Spa, Sorobon Beach Resort i Stoked.

TCB ta gradisí OLB, BIA, PG, BonLab i BHM/BOG pa e logro aki. Sigur na esnan ku desde mart 2020 a anhelá pa e dia aki. Ban sigui mantené na e reglanan stipulá pa asina mantené nos isla seif i saludabel pa nos sigui yama nos bishitantenan bon bini.

---

Lesa tambe:

• 
  Prevení Zika, Dengue i Chikungunya |Aviso pagá
• 
  Zorgtuin Gorssel a konta tokante eksperensia positivo ku trato di pashent ku Alzheimer
• 
  PVDA/GROENLINKS e partido mas grandi bou di votadónan Hulandes den eksterior
• 
  Pashasi pa i for di Boneiru lo bira un poko mas karu atrobe ku subida di tarifa di BIA
• 
  Persona ku un limitashon riba islanan BES ta haña mas derecho