WILLEMSTAD – Ministerio di Enseñansa i Kas di Aruba ta bai hèndel e problemátika di vivienda pa studiantenan ku ta bai Hulanda. Aktualmente tin un lista di espera pa vivienda  pa studiante na Hulanda i esei no ta konta pa studiantenan ku ta bini di afó so, pero pa studiantenan Hulandes tambe.

E problemátika di vivienda ta asina grandi e aña aki ku sierto universidat a konsehá studiantenan ku no tin kas ainda pa posponé nan biahe pa Hulanda e aña aki. Segun Promé Minister masoménos 40 studiante no tabatin un alohamentu fiho na nan yegada na Hulanda,  pero mientrastantu nan a haña kas pa 1 di sèptèmber 2022.

E studiantenan aki ta keda temporalmente serka famia, amigu òf den un hotèl pa studiante. Tin diferente hotèl pa studiante den diferente siudat, pero nan ta mas karu. Den algun kaso e studiantenan a haña un kamber, pero a nenga esaki pa motibu ku e kamber tabata muchu chikí òf pasobra nan tabata ke algu mas kómodo, ku konsekuensia ku nan mester a kuminsá e proseso pa haña un kamber kompletamente di nobo. Ta importante pa menshoná si ku ningun studiante a keda sin dak riba nan kabes.

Sierto studiante a skohe pa biaha pa Hulanda sin un lugá di keda fiho, pero no kier a pèrdè e aña di estudio aki. Ta importante pa tin un adrès na Hulanda pa bo por inskribí bo mes na ofisina di registro sivil di e munisipio, ya ku Hulanda tin reglanan masha estrikto. Tanten ku bo no tin un adrès pa inskribí bo mes, bo no por habri kuenta di banko i bo no por firma un akuerdo pa servisio di internèt i servisio di telefon.

Kas di Aruba

Ministerio di Enseñansa i Kas di Aruba ta bai prepará e studiantenan mihó otro aña pa loke ta trata e problemátika di vivienda.

Den sierto siudat na Hulanda studiantenan por inskribí nan mes minimalmente un aña promé ku nan aña di estudio pa un kas. Esaki ta hasi e chèns mas grandi pa studiantenan por haña un apartamentu òf un kamber na tempu. Aktualmente Kas di Aruba no ta okupá su mes ku vivienda pa studiantenan, pero lo pone informashon tokante vivienda riba nan sitio wèb i ofresé guia pa futuro studianten. 

Gobiernu di Aruba ta reorganisando Kas di Aruba i ke logra ku esaki ku lo adaptá e ròl di Kas di Aruba pa kumpli ku eksigensianan di e siudadano di Aruba. Esaki ta enserá un akohida mihó pa studiantenan di Aruba ku ta bin Hulanda pa estudionan mas avansá.

Gobièrnu ta traha tambe ku sekretario di estado di Hulanda Alexandra van Huffelen pa duna studiantenan di Aruba nan Burgerservicenummer (BSN) promé ku nan yega Hulanda. Si e studiante tin su number BSN delantá esaki ta dun’é e posibilidat pa regla hopi asuntu na tempu, inkluso vivienda.

Pero ta na gobièrnu Hulandes pa duna òf keda sin duna un number BSN delantá, ya ku esaki ta un desishon hopi grandi. Promé Minister di Aruba a duna di konosé ku e lo bai kòmbersá ku gobièrnu Hulandes i ta spera di logra esaki.