KRALENDIJK- United Airlines, den kolaborashon ku Tourism Corporation Bonaire, gobièrnu di Boneiru, BONHATA i Bonaire Flamingo International Airport (BON), a anunsiá e añadishon di dos buelo semanal èkstra for di New York/Newark (EWR) pa Boneiru (BON) en espera di un temporada di biahe drùk den próksimo wenter i primavera.

Aktualmente United ta ofresé un biaha pa siman buelo pa Boneiru for di Houston (IAH) i un biaha pa siman for di New York/Newark (EWR), i lo amplia su servisio for di New York/Newark te na tres biaha pa siman pa kumpli ku e pedida persistente di biaheronan merikano ku ke bishitá nos isla hulandes karibense.

For di 10 di yanüari 2024, i esakinan ya kaba ta disponibel pa buk awor akí, United Airlines ta añadí buelo ida i buèlta riba djadumingu i djárason entre New York/Newark i Boneiru, banda di e buelo ida i buèlta riba djasabra. Ku e servisio èkstra akí, awor akí United ta ofresé en total 61 buelo ida i buèlta planiá entre Merka i Boneiru for di 10 di yanüari 2024 te ku 24 di aprel 2024.

“Nos ta kontentu di por traha huntu ku United Airlines pa e wenter binidero trese dos buelo semanal nobo pa nos isla,” segun Miles Mercera, direktor di Tourism Corporation Bonaire. “Esaki ta un prueba di nos reputashon ku ta kresiendo serka biaheronan merikano i nos ta anhelá pa yama bon biní na nos bishitantenan na nos bunita isla Boneiru ku tur loke e tin di ofresé, i esaki ta konta pa tantu esunnan ku a yega di bini kaba, komo esunnan ku ta bishitá nos isla pa promé biaha.”