KRALENDIJK- E Union pa Konsumidó, Unkobon, ta defende su mes kontra di atakenan ku e organisashon ta kalifiká komo inhustu. Resientemente, durante un presentashon den Konseho Insular, Tienda pa Konsumidó, ku ta wòrdu subsidiá dor di gobièrnu, a tilda Unkobon di ta dirigí primeramente riba stranhero riba e isla, i ku nan lo ta ménos koperativo. 

“For di lantamentu di Unkobon na 2012, Unkobon a traha huntu ku Fundashon Tienda pa Konsumidó Boneiru na e interes di tur konsumidó. Algun logro den koperashon ku Fundashon Tienda pa Konsumidó i OLB tabata den 2014 unda ku den palabrashon ku e organisashon di supermerkadonan a realisá e proyekto Bon Kompra. Den luna di ougustus 2018 a inisiá ku e proyekto Komparashon di Preis. 

E Komparashon di Preis tabata un inisiativa di e ministerio EZK. E proyekto aki a keda realisá ku koperashon di: EZK,  RCN, Unkobon i Fundashon Tienda pa Konsumidó. E proyekto aki a keda finansiá pa EZK.

Ewald Abdul

Unkobon ta mustra riba e echo sinembargo, ku for di dia ku Ewald Abdul no tabata presidente mas na Tienda pa Konsumidó, e koperashon a bira difisil. Segun Unkbon nan a hasi vários intento pa sinta na mesa ku Tienda pa Konsumidó, pero esaki nunka no a materialisá.
‘’Pesei nos a disidí pa laga inisativa na Tienda pa Konsumidó numa, pero nunka mas no a tende di nan”, asina Unkobon ta skibi riba entre otro su página di Facebook.