KRALENDIJK- Direktiva di Union di Penshonado pa Adelanto i Hustisia (UPAH), huntu ku Komishon di Aktividat (KOMAK) a organisá djasabra 21 di mei 2022, un mainta sosial pa miembro- i interesadonan. Esaki a tuma lugá di 9or pa 11or di mainta na Sala Imelda di misa La Birgen di Coromoto na Antriol. 

KOMAK ta trata di kombiná e maintanan sosial ku un tópiko òf aktividat interesante. E biaha aki e mainta sosial ta den kuadro di moveshon pa promové salú di nos grandinan. Pa e motibu akí a invitá un fisioterapista di ‘Fisio di Bario’ pa bin duna informashon i introdukshon ‘kon nos penshonadonan por tin un bida saludabel di kalidat haltu, hasiendo moveshon na un manera responsabel’.