KRALENDIJK – E partido di oposishon mas grandi na Boneiru, Union Patriótiko Boneriano (UPB), a ekspresá nan preokupashon tokante e aktitut di Representante di Reino Jan Helmond, den kestion di e problema na Selibon.

Segun e partido, e aktitut di e Representante di Reino, ku ta bai den direkshon di un  konfrontashon ku Kolehio Ehekutivo, no ta kontribuí na haña solushon pa problema ambiental urgente, manera e situashon na Lagun, òf maheo di awa residual.

UPB ta enfatizá ku salubridat públiko, naturalesa i medio ambiente mester ta na e promé lugá, i ku un lucha di poder entre gobièrnu di Reino i esun di Boneiru, no solamente ta inefektivo, pero tambe dañino pa e komunidat.

E partido ta indiká ku desde e integrashon di Boneiru den e sistema estatal Hulandes na 2010, ta kla ku e isla no tin e medio, eksperensia i kapasidat pa ataká e problema di sushi riba su mes. Segun UPB ta bisa, falta di sosten for di Den Haag a agrevá e situashon.

Mas konstruktivo 

E partido ta hasi un apelashon pa yega na un un kolaborashon mas konstruktivo entre e Kolegio Ehekutivo i e gobièrnu Hulandes, kaminda si nesesario asta hasi uso un mediadó pa yega na akuerdo realista i sostenibel. “Atendé ku e problema di sushi ta esensial pa limitá e riesgo pa salubridat públiko i medio ambiente,” asina e partido berde a skibi den un deklarashon djaluna.

UPB ta insistí ku e Representante di Reino mester enfoká riba su ròl mas pa promové diólogo i konfiansa, na lugá di konfrontashon.