Van Huffelen: ‘Koperashon obligá ku islanan lo faya’

DEN HAAG – Apesar di krítika di VVD i CDA Alexandra van Huffelen no tin intenshon di tene supervishon riguroso riba palabrashonnan ku Aruba, Kòrsou i Sint Maarten. “Koperashon obligá ta kondená na faya.”

 Caribisch Netwerk | Oscar van Dam

Van Huffelen ta reakshoná riba e atake fuerte ku el a haña djaweps último den Tweede Kamer di entre otro miembro di Kamer pa VVD Roelien Kamminga. E ta haña ku tabata ‘un trayekto difísil’ pa yega na e akuerdonan mutuo i ku su partido tin preukupashona ainda.       “Desafortunadamente pasado ta siña di e kaso aki ku konfiansa ta bunita, pero kòntròl ta mihó.”

“E paisnan a komprometé nan mes pa realisá e reformenan. Mi ta sali for di e punto di bista tambe ku nan ta bai hasi esei”, Van Huffelen ta bisa prensa Karibense. “Si esei no ta asina, ta bira difísil pa nos (Hulanda, red.) pa hasi nogoshi. Esei ta konta pa kada senario empresarial, tantu pa pais- komo empresanan.”

‘Sèn grátis’

Van Huffelen ta kunsumí ku e impreshon ku spesialmente den prensa Hulandes ta insinuá ku Hulanda ta duna ‘sèn grátis’ na e islanan. “Naturalmente esei no ta asina.”

Gabinete Hulandes a primintí di duna supsidio pa proyektonan riba e islanan. “Pero esei ta sosodé semper a base di kondishonnan, Hulanda semper ta hasi esei.” E islanan mester realisá e proyektonan manera ku nan a bisa ku nan ta bai realisá nan, segun e sekreario di estado. Esei ta nifiká tambe ku ta ‘atministr’é finansieramente ordená’.

Reforma riba e islanan 

Dia 4 di aprel di e aña aki promé ministernan di Aruba, Kòrsou i Sint Maarten i e sekretario di estado di Relashonnan di Reino a pone nan firma bou di un Akuerdo Mutuo. Ku esaki a pone un base hurídiko pa koperashon duradero pa e reformanan den sektor públiko di islanan Karibense di Reino.

Banda di e reformanan  finansiero, ekonómiko i sosial, ta trata tambe di reformanan den enseñansa, salubridat i refuerso  di estado di derecho. E akuerdo mutuo a bini na lugá di Coho (Caribisch Orgaan voor Hervorming en Ontwikkeling), den kua despues di un periodo di introdukshon largu e paisnan Karibense di Reino no a mira futuro mas den dje.

Kaminda e Coho mester a bira un órgano apart, e akuerdo mutuo ta keda kai bou di minister di Asuntunan Interior. Aki miembro di Kamer pa VVD Roelien Kamminga tin pregunta atrobe. Pasobra awor ku no por papia di un organisashon independiente ‘nos por konta riba nos dede ku mui pronto nos lo ta pará kontra otro i stanka den diskushonnan di si i nò sin fin’.

Gabinete Hulandes ke traha huntu ku e islanan riba un otro manera, Van Huffelen ta bisa Tweede Kamer. “Nos punto di salida ta: nos ta traha a base di konfiansa. Mi ta konta ku e paisnan lo hasi todo por todo pa e mundu di nan habitantenan bira mihó.”

Anteriormente el a bisa den un kòmbersashon ku prensa Karibense ku e tabata asombrá di e imáhen negativo rondó di e Akuerdo Mutuo. Segun e mes ta bisa e tabata prepará kaba si pa preguntanan krítiko di Kamer.