KRALENDIJK – “Víktimanan di trafikashon di hende tin miedu pa buska yudansa.” Esaki Ofisina Yudansa na Víktima ta konkluí. Na aña 2020 nan a duna asistensia na dos víktima di e krímen aki.

Ministerio Públiko tambe atmití ku ta difísil  pa persiguí kasonan di trafikashon di hende òf eksplotashon pasombra hopi bia e víktima nan mes no ta bini dilanti. “Pa e aña aki Ministerio Públiko tin dos kaso di trafikashon di hende pendiente den Korte”, Roderick Gouverneur ta bisa. E ta bosero di Ministerio Públiko.

Impakto

Segun Ofisina Yudansa na Víktima,  e krímen aki tin un impakto emoshonal enorme riba e víktima. “Hopi bia e víktima ta biba bou di miedu i menasa. Den kasonan ekstremo, hasta nan bida ta kore peliger”, un kolaboradó ta splika.

“Mester tin un kampaña di konsientisashon. Ta prohibí pa keda ketu, nos mester sigui papia tokante e tópiko aki”, Pastor Ivan Gomez ta bisa. E ta fundadó di Caritas, e organisashon ku ta yuda migrantenan sin dokumentu di estadia. Gomez ya a bai den publisidat pa pone atenshon riba e tema aki. “Mi ta keda traha huntu ku defensor di pueblo pa por hasi un diferensia”, e ta klousurá.