Hulanda

Vota pa bo inisiativa di bario favorito di Karibe pa un Appeltje van Oranje 2024 

DEN HAAG – For di ayera 22 di mei te ku 31 di mei 2024 bo por vota pa bo inisiativa favorito pa un Appeltje van Oranje durante e Stemtiendaagse (djes dia largu ku bo por vota pa bo favorito). Bou di e tema ‘Soledad bo ta aliviá huntu’ inisiativanan di barionan Hulandes i di Karibe – sinkuenta na tur – ta kompilá mas tantu voto posibel pa nan proyekto pa asina tin e chèns pa haña un Appeltje van Oranje. 

Tur aña e organisashon ta otorgá e Appeltjes van Oranje na tres proyekto sosial den Hulanda i den Karibe. Inisiativanan ku ta hasi esfuerso pa un komunidat kaminda niun hende no ta pará su so. Tambe tur aña ta proyektá un otro tema. 

Den Karibe tin nuebe kandidato:

  1. Club Kibrahacha 60+: Un punto sentral pa topa pa personanan di terser edat Arubiano, kaminda diariamente ta ofresé aktividatnan pa aliviá e soledat i promové un estilo di bida aktivo. 

            
Club Kibrahacha 60+ ta un sentro ku ta situá sentral, kaminda personanan di terser edat Arubiano ta topa otro.  E fundashon ta ofresé aktividatnan diariamente, di manera ku e impakto di soledat ta bira ménos. Na mes momento Club Kibrahacha 60+ ta stimulá un estilo di bida aktivo i involukrá, di moda ku grandinan ta partisipá mas tantu posibel den komunidat. Club Kibrahacha 60+, ta ofresé un skala ámplio na aktividat, ku ta varia di arte i gimnasio te aktividatnan rekreativo, ku ta adaptá na interes- i posibilidatnan di nan miembronan. Pa hasi e aktividatnan mas aksesibel posibel e fundashon ta ofresé transporte grátis.   

  1. Unity in Harmony (721 Kids Foundation): Ta uni muchanan ku i sin nesesidatnan spesial na Sint Maarten pa medio di aktividatnan i un programa di amigu. 

Muchanan vulnerabel i teenagernan por haña nan ku desafionan ora nan topa otro. P’esei 721 Kids Foundation na Sint-Maarten ta pone e muchanan aki den kontakto ku muchanan ku no tin nesesidatnan spesial. Nan ta siña konosé otro entre otro pa medio di un programa di amigu i aktividatnan ku ta apto pa tur hende. Hasiendo kosnan huntu ta krea un aliansa. “Ta obligashon di nos komunidat pa laga muchanan vulnerabel tambe partisipá i yuda nan konstruí un ret sosial”.

  1. Heart-Centered Impact Coaches: Boluntarionan hóben na Aruba ku ta fungi komo ehèmpel  i mèntòr pa hóbennan, inspirá i sostené nanora ta diskutí riba asuntunan di salú mental.

Danki na Heart-Centered Leadership Foundation (HCLF) hóbennan na Aruba no ta pará nan so. Nan por bai serka Heart Centered Impact Coaches (HCIC’s): boluntarionan hóben ku ke ta un modelo, partner di kòmbersashon i mèntòr pa hubentut di Aruba. Nan meta? Inspirá hóbennan for di 13 aña, hasi nan fuerte i motivá nan pa papia tokante problemanan ku nan ta topa.

  1. Hunto Grandi, Grandi Hunto (Movemiento ta Bida): Un proyekto na Aruba ku ta tene grandinan aktivo i ta stimulá nan pa partisipá na aktividatnan diario den komunidat. 


Hunto Grandi, Grandi Hunto ta para pa: huntu nos ta fuerte i huntu nos ta krese. Esei ta nòmber di e proyekto pa grandinan na Aruba, un inisiativa di Caribische Fundacion Movemiento ta Bida. E fundashon ta dirigí riba bienestar di grandinan. No físikamente so, pero tambe mental. Kon? Promoviendo interakshon sosial i enbolbimentu den komunidat.

  1. Kuido di famia i konosí nos ta hasi’é huntu: Ta ofresé sosten na Kòrsou na Kuidadónan di famia i konosí, ku hopi biaha ta lubidá riba nan, pero ku ta di balor enorme pa nan próhimo. 


Fundashon Kuido di famia i konosí nos ta hasi’é huntu ta ofresé apoyo na kuidadónan di famia i konosí na Kòrsou. Pasobra no tin atenshon pa kuido informal riba e isla Karibense, mientras hustamente kuidadónan di famia i konosí ta asina importante. Hopi biaha nan no tin tempu pa nan mes i ta drenta den un isolashon, pasobra nan bida ta karakterisá pa kuido pa otro. Pa medio di Kuido di famia i konosí nos ta hasi’é huntu nan por partisipá mensualmente na aktividatnan relahante i bishitá enkuentronan di informashon.

  1. Adopt A Grandparent Experience (Hearts United Holistic Care Foundation): Ta konstruí un brùg entre grandi- i studiantenan na Sint Maarten  pa kombatí soledat i fortifiká lasonan entre generashonnan.

Grandinan na Sint Maarten ta indiká ku nan ta eksperensiá soledat pa motibu di bishita limitá di famia òf amigunan. Danki na e proyekto Adopt A Grandparent Experience (AGE) studiantenan ta bishitá nan ku regularidat. Nan ta kombersá, hunga wega i hasi diferente aktividat. E boluntarionan hóben ta yuda tambe ku hasi kompras, drecha kosnan chikitu den kas i ta yuda e grandinan ku uzo di teknologia, di moda ku nan por keda den kontakto ku nan sernan kerí ku posiblemente ta biba i traha den eksterior.

  1. Latter Years can be Brighter Years (Home away from Home): Ta organisá aktividatnan pa grandinan na Sint Maarten pa mehorá nan bienestar i promové un sentimentu di komunidat.

    Home Away From Home Taking Care òf Stichting Gouden Eeuw 

ta kombatí soledat bou di grandinan na Sint Maarten. E fundashon ta organisá henter aña evento- i aktividatnan pa mehorá bienestar di grandinan. Organisando aktividat pa i ku personanan di terser edat nan ta keda mentalmente, físikamente i sosialmente aktivo. “Den transkurso di añanan nos tabata testigu di desaroyo di amistatnan spesial i nos a krea un ambiente, kaminda kada ken ta sinti su mes famia, apresiá i respetá”.

  1. Un copi te serca FAVI: Ta informá personanan di limitashonnan visual i ta ofresé asistensia na hendenan ku defisiensia di bista i personanan siegu na Aruba.

Fundacion Arubano di Esnan Visualmente Incapacita (FAVI) ta hasi esfuerso pa 50 aña kaba pa personanan ku defisiensia di bista i personanan siegu na Aruba. E fundashon ta guia i yuda hendenan di tur edat ku un limitashon visual. “Nos ta skucha, duna konseho, guia i ta enkurashá personanan tambe pa haña nan plaser den bida bèk.” Klientenan, kaminda e manera di traha aki a bai bon, ta motivá klientenan nobo i komunidat: “Den nan ròl komo mèntòr nan ta ehèmpel pa otro. Un fuente di inspirashon.”

  1. Technology for seniors (New Challenges Foundation): Ta instruí grandinan na Sint-Eustatius den abilidatnan  digital, di manera ku nan por komuniká ku nan sernan kerí. 


Ku e inisiativa ‘Technology for older adults/seniors to stay in touch with family’ grandinan ta haña yudansa riba tereno di teknologia. Komo ku nan ta siña kon traha ku un telefon selular, tèblet òf kòmpiuter, nan por keda mira nan sernan kerí via Whatsapp ku yamadanan di video. Grandinan ta sinti nan ménos so i ta gusta ku nan ta siña algu nobo.

Deel dit artikel
Rocargo
Rocargo
Rocargo
Rocargo