Votadónan pafó di Hulanda por registrá ainda pa elekshon na Hulanda

DEN HAAG – Habitantenan di e islanan Hulandes Karibense ku tin un pasport Hulandes por registrá ainda te 1 di febrüari pa por tin influensia riba e konstelashon di Eerste Kamer na Hulanda.

Riba 15 di mart ta skohe e kolegio elektoral pa e asina yamá no-residentenan. E elekshon aki pa kolegio elektoral ta duna personanan di 18 aña p’ariba ku un pasport Hulandes ku no ta biba na Hulanda un voto indirekto pa Eerste Kamer.

Esun ku ke partisipá mester registrá si. Esaki mester sosodé tambe si bo a partisipá kaba komo votadó den eksterior pa otro elekshon.

Te ku awor votadónan pafó di Hulanda por a vota solamente pa Tweede Kamer i Parlamento Europeo.

E elekshon di kolegio elektoral ta un elekshon indirekto. Miembronan di e kolegio elektoral no-residente tambe ta vota pa e elekshon di miembronan di Eerste Kamer. Nan ta hasi esei huntu ku e miembronan di Parlamento Provinsial.

Bo por haña mas informashon riba e sitio wèb www.stemmenvanuithetbuitenland.nl