WILLEMSTAD – Wardakosta a interseptá den madrugá di djarason 13 pa djaweps 14 di yüli un transporte di droga. Na kosta sùit di Kòrsou e barku di marina Zr. Ms Groningen a logra forsa un asina yamá go-fast pa para den tempu rèkòrt.

Groningen ta nabegá for di ayera pa wardakosta i ta despues di un trayekto di treinen intensivo e tabatin algun ora ku a pon’é operashonal. Riba e mésun dia ku e tripulashon a finalisá e ehersisio final ku éksito e barku a optené su promé resultado operashonal. 

Wardakosta a deskubrí  e go-fast i inmediateamente a pone Ms Groningen i e helikòpter di wardakosta den akshon. Hasiendo uso di e dos lanchanan rápido a ordená e go-fast pa para. E tripulante a nenga di para i finalmente mester a lòos tirunan di atvertensia dirigí riba e motornan di boto i a logra deskonektá nan. 

Banda di e sinku tripulantenan i e 650 kilo di droga a haña tambe kuater arma di kandela na bordo. Un Metal Shark di Wardakosta a tuma e tripulante, e pakinan di droga i e armanan di kandela for di Ms Groningen i a hiba nan Steunpunt na Kòrsou.

A entregá e sospechosonan, e droga i e armanan di kandela na Kuerpo Polisial Kòrsou ku lo sigui ku e investigashon den e kaso aki.