WEB a hasi apelashon riba parlamentarionan hulandes

Kralendijk- WEB N.V. a hasi uzo di e presensia di vários parlamentario hulandes riba nos isla, pa duna esakinan un presentashon di e plannan di e kompania di utilidat.

Pa motibu di e demanda kresiente pa koriente, mester ekspandé e kapasidat di produkshon. Pa e motibu aki WEB kier hasi e invershon nesesario pa hasi e manera di generá elektrisidat mas duradero. Mas uzo di energia di bientu i solo lo kondusí na un bahada drástiko di e tarifa di elektrisidat.

E proposishon di WEB ta riba mesun liña ku e deseonan di Tweede Kamer manera esakinan ta stipulá den diferente moshon. E plannan di WEB a keda presentá na Ministerio di asuntunan ekonomiko i klima (EZK), pero esaki ainda no a tuma un desishon tokante e petishon pa supsidio.

Tempu

WEB, den su presentashon pa e parlamentarionan a enfatisá ku tempu ta kabando: si no tuma un desishon pa òktober, lo ta nesesario pa pone generator di diesel adishonal, ku ta nifiká ku WEB lo sigui dependé di petrolio karu i kontaminadó.

Na nòber di Kolegio Ehekutivo, diputado Nina den Heyer tambe tabata presente durante e presentashon. E diputado a enfatisá ku BC ta pará kompletamente tras di e inisiativa di WEB.

WEB i Den Heyer a supliká e parlamentarionan pa pone preshon serka gabinete Rute pa tuma un desishon positivo pa ku e plannan di WEB, pa por realisá un redukshon di tarifa i alabes hasi e proseso di produkshon mas duradero.