KRALENDIJK- Den e periodo di 31 di yanüari te ku 14 di febrüari 2022, Water- en Energiebedrijf Bonaire (WEB) ta bai hasi un enkuesta tokante kalidat di servisio pa loke ta trata awa i koriente na Boneiru. E kompania di utilidat ta invitá komunidat di Boneiru pa partisipá i laga tende bo opinion.

Ku e investigashon aki WEB ke haña un bista di e persepshon i satisfakshon di klientenan i kon e servisio i komunikashon na e kliente por ser optimalisá. Basá riba e resultadonan di e investigashon WEB por saka afó kua aspektonan mester di atenshon i ki mehorashonnan konkreto mester ser implementá pa por garantisá e kalidat di servisio deseá. Tambe WEB Bonaire ke haña un bista di eksperensia i deseonan di abitantenan tokante produktonan duradero.

Digital

Tur abitante i kompanianan di Boneiru ta risibí un karta di invitashon huntu ku nan faktura pa partisipá na e enkuesta. Den e karta tin un QR code ku mester scan ku un telefòn móbil pa por haña akseso na e lista di pregunta digital. Por haña e lista di pregunta tambe riba www.webbonairesurvey.com for di 31 di yanüari te ku 14 di febrüari 2022.

WEB Bonaire di antemano ta gradisí abitantenan pa nan partisipashon i kontribushon na futuro di e suministro di awa i koriente na Boneiru.