WEB ta selebrá apertura di planta di awa di bebe huntu ku su penshonadonan

KRALENDIJK – Riba dia 28 i 29 di òktober lo selebrá e apertura ofisial di planta di awa na Hato. Pa motibu di seguridat i medidanan di COVID -19 pa distansia i higiena WEB ta selebrá e festividatnan den diferente grupo chikitu. 

Na aña 2020 i 2021 WEB a realisá vários meta importante. Pero pa motibu di COVID-19 esakinan no por a keda selebrá. Na e momentu aki WEB tin e apertura di planta nobo di awa di bebe i a finalisá e proyekto di reparashon i ekspanshon di pipanan di awa di irigashon entre Hato i Belnem, E promé selebrashon tabata dia 25 di òktober pa e penshonadonan. 

Durante di e enkuentro festivo aki na Eddy’s Restaurant Alfredo Koolman, CEO di WEB a duna informashon di e proyektonan mas resien di WEB. Invitadonan por a disfrutá di un dushi desayuno akompañá ku músika. 

WEB ta gradesí tur su penshonadonan pa nan dedikashon. Nan kontribushon ta invaluabel pa e éksito di WEB i komunidat di Boneiru.