KRALENDIJK- Segun WEB N.V. e temperaturanan ekstremo ku ta eksperensiando hopi trempan e aña aki ta sòru pa un demanda haltu di tantu awa komo elektrisidat. 

Nan ta sòru tambe pa algun kontratempu operashonal den e kompania. Na e momentunan aki tin bateria i parti di e kapasidat di produkshon di bientu for di servisio pa motibu ku ta trahando riba ekspashon di kapasidat di e kompania. 

E interupshonnan di koriente di djaluna 5 di yüni tambe a wòrdu kousá pa e motibu aki. Banda di esei Water- en Energiebedrijf Bonaire (WEB) a eksperensiá 2 interupshon separá riba e mesun kabel den área di servisio na Lagun i besindario.

Segun e pronóstiko di tempu ta spera ku e temperaturanan haltu lo kontinuá. Mas awa i elektrisidat ta ser uzá. WEB ta mustra ku e temperaturnan haltu, kòmprèsernan di èrko mester traha mas duru pa por yega na temperaturanan mas abou. Esaki ta kondusí na demanda haltu, pero tambe gastunan haltu pa e konsumidó.

Tep

Pa e motibu aki WEB ta duna tep pa tene kuenta ku e diferensia di temperatura pafó i paden ora ku ta ahustá e temperatura di èrko. E tep ta pa no hasi e diferensia entre e temperatura paden i esun pafó mas ku 10 grado.

Tambe WEB ta duna e konseho pa muha mata parti anochi, di forma ku e matana por absorpá esaki miho. Segun WEB ta bisa, eskohonan inteligente di e konsumidá ta pone ku e faktura di koriente i awa por bin mas abou fin di luna.