Notisia

Wereld Natuurfonds di Hulanda a lansa website dediká na region di Karibe Hulandes

KRALENDIJK- Wereld Natuur Fonds (WWF-NL) ta enbolbí na Karibe Hulandes for di añanan 60, i awor a tuma e siguiente paso pa lansa un website dediká spesífikamente n’e region di Karibe Hulandes. 

E website nobo, wwfdutchcaribbean.org, ta duna un relato ekstenso di e esfuersonan pa konservá naturalesa ku WWF-NL ta hasiendo riba e islanan di Boneiru, St. Eustatius, i Saba (islanan BES) i tambe duna informashon tokante e metanan di WWF-NL pa henter e region, inkluso Kòrsou, Aruba i St. Maarten. E website ta deskribí tambe kon WWF-NL ta traha huntu ku hopi partner lokal i regional, inkluyendo parkenan nashonal i organisashonnan di naturalesa, p’asina logra su metanan.  

Riba e website tin informashon tokante WWF-NL su Strategia Marino pa Karibe Hulandes p’e próksimo sinku añanan. E enfoke di e strategia ta pa protehá i restorá e medio ambiente marino den Karibe Hulandes dor di salbaguardiá i forma refnan di koral resiliente i espesienan emblemátiko saludabel (tribon, manta, bayena, dòlfein, i turtuga) ku por resistí kambio di klima i otro preshonnan ambiental. 

E website ta kubri tambe tópikonan manera e sektor di peska i piskamentu sostenibel, espesienan ku ta den peliger di ekstinshon, i polushon di plèstik. Riba e ‘homepage’ di e website tin asta un lenk direkto pa e plataforma grátis di e-learning, Beyond Plastics, kaminda tur hende por siña fásilmente tokante e importansia di redukshon di uso di plèstik pa un medio ambiente mas sigur.

Informá

“Despues di hopi aña ku WWF-NL a bin ta sostené aktivamente e organisashonnan lokal di naturalesa na Karibe Hulandes i finansiando proyektonan importante pa protehá e lamannan rondó di e islanan, hopi hende ainda tabata puntrámi: kiko eksaktamente WWF ta hasi riba e islanan? Kiko ta boso metanan i kon nos por traha huntu?” asina Arjan de Groene, kende ta Landscape Coordinator Caribbean na WWF-NL ta bisa. E ta sigui ku satisfakshon, “Kreando e website akí lo yuda nos pa informá tur hende mihó tokante e balor di naturalesa i e ròl di WWF p’e islanan, i nos ta spera ku asina nos lo por forma relashonnan nobo i mas fuerte ku e hendenan lokal ku ta kompartí nos vishon.” 

Pa medio di e website nobo akí di Karibe Hulandes, WWF-NL ke enfatisá su kompromiso pa ku e region. Alabes WWF ta transformando di un finansiadó pa un implementadó ku a integrá lokalmente, p’asina konektá i establesé kolaborashon den region pa maksimalisá su impakto. 

E habitantenan di e islanan di Karibe Hulandes ta kordialmente invitá pa bishitá e website nobo wwfdutchcaribbean.org pa haña sa mas tokante konservashon di naturalesa riba nos islanan, i enbolbí aktivamente den protekshon i restorashon di nos medio ambiente.

Deel dit artikel
Rocargo
Rocargo
Rocargo
Rocargo