WILLEMSTAD – Wes a pone un fin na e akohida di refugiadonan éksitente na Kòrsou. E régimen di prizòn ku refugiadonan i migrantenan di Venezuela ta haña nan konfrontá kuné, ta intolerabel segun wes i ta un violashon di derechonan humano bou di e Tratado  Europeo pa Derechonan Humano. 

Konsekuentemente Kòrsou no tin akohida pa estranhero mas na e momentu aki. A pone nuebe Benesolano den libertat inmediato.

E sentensia a bini despues ku wes mes a disidí di bai tira un bista den prizòn SDKK na Koraal Specht siman pasá na final di huisio. E baraknan pa estranhero, ku Hulanda a kontribuí kuné ku miones di euro pa drecha nan, no ta kla ainda. Pa e motibu ei a pone e  Benesolanonan, ku a hasi un apelashon riba e Tratado Europeo di Derechonan Humano den blok 1, ku ta un parti di e prizòn.

Esei a resultá luna pasa kaba den un veredikto kaminda a pone un señora Benesolano, ku tabata den e parti di hende muhé den e prizòn, den libertat. Wes su ponensia tabata ku no ta tolerabel pa  interná un estranhero temporal den un instituto penitensial bou di un regimen di prizòn.

Blòk 1

E ora ei Kòrsou a disidí di muda tur prisonero di blòk 1 pa otro sitio i apunta via di un  dekreto  ministerial  blòk 1 komo e sitio kaminda ta sera estranheronan ku no tin pèrmit di estadia, ounke nan a pidi asilo.

Sinembargo e régimen di prizòn a keda. Wes a konstatá  durante di su bishita ku e benesolanonan tabata bou di un régimen mas severo ku prisoneronan ku tin un sentensia penal.

E konklushonnan di wes ta kuadra perfektamente ku  opservashonnan anterior di Amnesty International,  ku a hasi dos biaha un investigashon riba situashonnan ku refugiadonan detené na Kòrsou  ta topa.

Akohida

Ku e sentensia di wes no por usa e akohida di estranhero mas. Mester a laga un hòmber benesolana, ku mester a deportá djadumingu último, den libertat pa motibu di skarsedat di akohida.

Segun Ieteke Witteveen di Human Rights Defense Curacao, ku ta asistí e Benesolanonan ku a laga den libertat, konsekuensia di violashon  di derechonan humano i e maneho ku Kòrsou a hiba, ta ku e kantidat di Benesolanonan ku ta purba di drenta Korsou ta mengua.

“E isla no tin un prosedura internashonal di asilo rekonosé, pero Benesolanonan por hasi un apelashon si riba e Tratado Europeo di Derechonan humano. Niun hende no a logra haña protekshon ainda ku e prosedura ei”, segun Witteveen.