KRALENDIJK- E anterior grifir di Entidat Públiko Boneiru Willem (Wimpy) Cicilia a skibi un karta pa kompani di kolekta sushi Selibon, pa ekspresá su preokupashon pa e kantidat di shushi ku ta wòrdu di dump den nos naturalesa.

“Mas i mas hendenan sin eskrúpulo ta tira sushi riba kamindanan di kunuku lagando un mal bista atras pa nos hendenan mes, pero tambe pa turistanan di barku ku ta hasi tour den e área”, asina Cicilia, ku por sierto tambe ta kandidato pa bira miembro di konseho insular pa partido UPB, a skibi. 

Cicilia ta skibi ku no mas ku ayera, pasa Kriabon bai pariba masomenos un 100 meter despues di e promé bògt, desgrasiadonan a basha sushi einan. Segun Cicilia, riba e mesun ruta aki, i mas pariba pasa APEM bira pariba di e dam grandi bai nort, tambe a tira sushi. E kamindanan mas aden tambe tur kaminda tin sushi bentá. 

Cicilia awor ta hasi un apelashon riba Selibon pa saka e sushi aki for di den kunuku. “Un súplika na Selibon pa alomenos kuminsá hasi e kamindanan prinsipal di kunuku limpi atrobe na un manera struktural, manera tbt pasa no muchu tempu pasá, i hasi e investigashon nesesario pa logra haña sa ken ta hasi e tipo di kosnan aki i dunanan büt, òf hibanan dilanti di mes bèrdè, i kuminsá ku un kampaña huntu ku otro stakeholders pa konsientisá pa nos tene nos isla limp”, asina Cicilia a skibi. 

Gobièrnu

Cicilia ta termina su karta bisando ku naturalmente gobièrnu di Boneiru tambe tin un ròl grandi den esaki. “Llo mi hasi mi esfuerso pa e kolegio nobo tin e aspekto aki haltu riba su lista di prioridat.  Mientrastantu Selibon a korto plaso por aktua pa aliviá e situashon, i gobièrnu  a korto plaso tambe mester por pone e medionan finansiero disponibel si Selibon mester di esaki.  Manera ku kos ta bai awor aki, no por sigui”.