KRALENDIJK- E tres hóbennan ku a biaha siman pasá pa Merka, a regresá Boneiru. Nan a hasi un bon trabou, ta loke Elton Taty Frans, e windsurfista profeshonal, a bisa. “Un bon trabou e hóben windsurfistanan  Nigel Hart, Bimbi Clappers i Terrence Clappers a hasi na Merka”.  

Nigel Hart, a sali na di promé lugá den ‘Freestyle men’. Nigel, apesar ku e no ta kustumbrá kore den e friu, a kore sólido i kada kontrinkante ku e mester a bai kontra dje, e tabata kore mas mihó, parse ku e friu no a molesti’é. Den e final, el a logra gana e Kanades ku tabata pa hopi tempu, den e mihó tòp 10 di mundu den freestyle. Pues esaki ta un gran logro pa Nigel, i mundu pafó, a kuminsá tira bista riba dje. 

Den kaso di Bimbi Clappers, tabata difísil, pa su mala suerte i el a shuata despues di a kome algu, nèt un dia promé ku e kompetensia di freestyle. Esei a pone ku e no por a kompetí. Mirando e bientu ku a bira ménos e dianan despues, no tabatin chèns pa e por a drecha su resultado. 

 Terrence Clappers, a logra sali na di 5 lugá den ‘Slalom/long distance MEN’. Su esfuerso pa kompetí den e grandinan i no den Junior, ta di apresiá. Aya nan a puntr’e kuantu aña e tin, pasobra su spit ta hopi haltu i pa yòn ku e ta, e spit ei, ta remarkabel. Di 5 lugá no ta malu, pero papiando ku Terrence, e la bias ku kos por a bai mihó, anto tòp 3 lo tabata posibel pe.