KRALENDIJK – Wereld Natuur Fonds (WWF-NL) ya pa hopi aña a komprometé su mes na redusí e uso di plèstik desechabel dor di ehekutá proyektonan. E proyekto mas resien a enserá un aktividat edukativo pa ‘naschoolse opvang’ na Boneiru. 

Kompetensia di klùr

A organisá un aktividat edukativo pa muchanan di skol entre 4 pa 12 aña. E muchanan a haña un presentashon interaktivo kòrtiku tokante plèstik desechabel i e daño ku esaki ta kousa na naturalesa i hende. Despues e muchanan tur a kuminsá klùr. E plachinan mas bunita di klùr a keda rekompensá ku un premio, danki na e patrosinadónan Between2Buns, Jibe City, Gio’s Gelateria & Caffé, Top1Toys, Something Sweet i NOBO Bonaire. E ‘naschoolse opvang-nan’ ku a partisipá n’e kompetensia di klùr ta Dopey, Kristu Bon Wardador, Bon Kwido i Pelikaan. En total, alrededor di 150 mucha a partisipá. 

Beyond Plastics

Den e periodo di 2012 te ku 2021 Boneiru Duradero, un inisiativa di sostenibilidat di WWF-NL na Boneiru, a ehekutá diferente proyekto i a duna sosten na Openbaar Lichaam Bonaire den desaroyo di e prohibishon di plèstik di un solo uso. Den 2022 e nòmber di e proyekto Boneiru Duradero a ser kambiá pa WWF Dutch Caribbean. Den e periodo promé ku a bin e prohibishon di plèstik di un solo uso, WWF-NL a introdusí na mart 2021 un programa di E-Learning tokante redukshon di plèstik, bou di e nòmber di Beyond Plastics.

Beyond Plastics ta un programa di E-Learning ku ta fásil aksesibel pa tur hende, ku módulonan pa skucha na papiamentu i ingles. E programa di E-Learning ta grátis, ya asina tur hende na Boneiru por siña mas tokante e importansia di redukshon di plèstik. Beyond Plastics ta brinda ademas un ‘toolkit’ na negoshinan den e industria di turismo, ku kual nan por inventarisá nan uso di plèstik desechabel i tambe siña tokante alternativanan duradero. Beyond Plastics ta optenibel grátis riba e website https://onlinelearning.wwfdutchcaribbean.org. E lenk akí ta aksesibel tambe via e website di Tourism Corporation Bonaire.