Notisia

Xploration Coastline ta bai produsí un mion liter di awa pa dia 

WILLEMSTAD – Ku ayudo di energia limpi Xploration Coastline Curaçao ta bai  produsí for di 2024 un mion liter di awa pa dia for di awa di laman pa e sektor agrario. Tambe por usa e plataforma durante desasternan natural den Reino i área di Karibe.

E purifikadó di awa móbil a firma riba 8 di dezèmber un akuerdo ku Aqualectra i Universidat di Kòrsou  pa desaroyo di e infrastruktura lokal nesesario pa konektá ku e instalashon flotante.

Dòbel 

Xploration Coastline Curaçao ta produsí tantu awa pa bebe komo awa agrario purifikando awa di laman i ta usa solamente energia limpi. Tur instalashon pa produkshon i tratamentu di awa, inkluso generadónan di awa ta riba un plataforma flotante. Asina por usa e totalidat rápido pa ayudo humanitario na momentu di desasternan dentro di Reino. Por kumpli ku e nesesidat pa awa na e sitio mésora.

Mayoria parti di aña e instalashon ta stashoná na Kòrsou pa kontribuí ku siguridat di kuminda. E un mion  liter di awa pa dia ta disponibel pa agrikultornan.

E uso dòbel ta pèrkurá ku ta parti e gastunan di invershon i mantenshon i asina e awa agrario ta bira pagabel. Xploration Coastline Curaçao ta kumpli asina ku e kondishon krusial pa duna e aktividat empresarial agrario na Kòrsou mas chèns pa ta kompetitivo.

Evento di estímulo

Di 9 te 11 di mei otro aña ta tuma lugá un evento Xploration Coastline Curaçao. Ta invitá empresarionan agrario lokal, habitantenan, organisashonnan di naturalesa i doñonan di tereno pa yega huntu na un plan pa desaroyo di e área rondo di e sitio kaminda e plataforma ta stashoná.

Ta entregá e plan na un komishon di direkshon interdepartamental di kuater ministerio ku lo kombertí e plan den maneho.

Deel dit artikel
Rocargo
Rocargo
Rocargo
Rocargo