KRALENDIJK – Ta bai bon ku turismo na Boneiru. For di informashonnan ku Tourism Corporation Bonaire, TCB, a duna por mira ku mas ku 170.000 bishitante internashonal a biaha bini e isla ku avion na 2022. Esei ta 12.000 mas tantu kompará ku 2019.

“E subida aki ta surpasá e nivel di promé ku pandemia, di akuerdo ku e Masterplan pa turismo i e plan di reskate pa turismo”, TCB ta trese dilanti. “Un demanda fuertemente reprimí, un nivel di konfiansa ku a mehorá, suspenshon di limitashonnan den e paisnan di orígen i un transporte aéreo kresiente pa e isla a duna e resultadonan un impulso.”

47 porshento di tur bishitante a bini di Hulanda, mientras ku 26 porshento a bini di Estados Unido di Merka i 12 porshento a bini di Kòrsou. Mayoria di e bishitantenan ta entre 45 i 65 aña.

Kasi 350.000 turista krusero a bishitá Boneiru, lokual ta dos tersera parti di loke a bini e isla na turista krusero na 2019.

Den futuro TCB ta bai traha huntu ku Bonaire Hotel and Tourism Association, BONHATA, i Entidat Públiko di Boneiru, OLB, pa adaptá e plannan di merkadeo pa atraé mas bishitante pudiente i konsiente di medioambiente i pa engrandesé e yegadanan di e merkado Norteamerikano.