Notisia

Youp Schmit na promé lugá na evento di promoshon mas grandi di Oropa den mundu di wentsùrf

KRALENDIJK – Entre 26 i 29 di mei 2022 nos koredó lokal di wentsùrf Youp Schmit a partisipá na e evento na e famoso sitio di wentsùrf aleman ‘Sudstrand’ na Fehmarn, Alemania.

Tur e markanan di wentsùrf i tambe markanan di pafó di e industria di wentsùrf a bini huntu na un solo festival grandi pa presentá nan ekiponan nobo i pa duna klientenan e oportunidat pa tèst e ekiponan nobo akí. 

E markanan a invitá nan koredónan tòp di wentsùrf pa duna demonstrashon òf pa trabou di promoshon. Mercedes-Benz tabata e spònser prinsipal di e evento i a organisá un kompetensia pa koredó di wentsùrf ‘freestyle’. E kompetensia akí a bira un éksito rotundo ku bientu duru i kondishonnan sumamente favorabel durante e evento.

Komo parti di e akuerdo di término largu di kolaborashon i merkadeo ku Tourism Corporation Bonaire (TCB) a firma ku Youp Schmit, TCB a duna un aporte na presensia  i partisipashon di Youp na e evento akí.

Nos ta hopi orguyoso di nos atletanan i e oportunidat ku nos a haña pa kolaborá pa promové Boneiru komo un paradiso pa koredó di wentsùrf. Nos ta spera mas evento komo parti di nos kolaborashon i nos lo sigui sostené nos hóbennan talentoso di Boneiru ku nan soñonan i akshonnan ku ta inspirá no solamente nos poblashon lokal, pero tambe henter mundu.

Aktualmente Youp ta biahando pa Italia pa un otro evento di wentsùrf. Nos ta deseá Youp i tur nos otro atletanan hopi éksito i nos ta spera di por yama nan bon biní dentro di poko atrobe.

Bishitá Youp su wèpsait: www.youpschmit.com i siguié riba Instagram: @Youpschmit

Deel dit artikel
Rocargo
Rocargo
Rocargo
Rocargo