KRALENDIJK/WILLEMSTAD- E kompania di aviashon Z Air, despues di un periodo di estudio i negosashon, a firma awe e akuerdo pa bini ku dos avion tipo djèt regional. Ta trata di dos avion Embraer 140.

Despues di a firma e kòntrakt, awor ta bai traha riba preparashon di e dos avionnan pa nan bin Kòrsou i pa wòrdu tumá den servisio. Segun direktor di Z Air, René Winkel, esaki lo bai tuma su tempu. Ta spera si ku e promé avion ta yega Kòrsou den último kuartal di 2024 i por wòrdu tumá den servisio relativamente rápido.

E avionnan nobo lo wòrdu usá primeramente pa buelonan pa Medellín, pero tin otro destinashonan ku lo bin aserka, unabes ku e dos avionnan a wòrdu agregá na e fleta. Mientrastantu tambe e tres Saab 340B ku ta usando lo keda forma parti di e fleta, primeramente pa buelonan entre Aruba, Boneiru ku Kòrsou.

Direktor di Z Air, René Winkel ta hopi kontentu ku e logro. “A tuma nos basta estudio i preparashon pa yega na e punto aki. Z Air semper ker a krese paso pa paso, na un forma kouteloso. Pa basta tempu nos ta studiando e tipo di avion aki, i nos ta konvensí ku e ta loke nos tin mester pa nos por sigui krese, ekspandé nos rutanan i sigurá un servisio na nivel”.

Sueyenne Dammerman, direktor komersial i finansiero di Z Air, ta mustra su mes orguyoso. “Semper nos a mustra di ta un kompania responsabel. Ku esaki nos ta mustra tambe ku, komo kompania 100% lokal, nos por. Basta traha di un manera responsabel i dirigí.”

Avion

E Embraer 140 ta un avion tipo djèt ku a keda produsí pa e kompania Embraer na Brazil, e ta karga 44 pasahero. E avion ta popular riba rutanan regional i pa hopi aña a wòrdu usá pa kompanianan rònt mundu i tambe ta hopi popular na Merka, unda nan ta bula pa American Airlines, American Eagle i United Express.