WILLEMSTAD – Djamars e kompania di aviashon, Z-Air a risibí su último adishon na su fleta di avion. Ta trata di otro Saab 340B+ di kual e kompania ya tin vários den su servisio.

Direktor di Z-Air, René Winkel a mustra anteriormente ku e kompania ta hopi kontentu ku prestashonnan di e Saab ku kual ta bulando pa vários destinashon. E avionnan aki tin 34 stul na bordo i ta basta espasioso. E avion djamars a bula e último pida di Miami pa Kòrsou na unda e avion i su pilotonan a wòrdu yamá bon biní pa koleganan di e aerolínea.

Mas avion

Awor.nu  ta komprondé ku banda di e avion Saab lo tin mas avion ku ta bin reinforsá Z-Air den un futuro no muchu leu, pero di esaki e kompania no ke divulgá muchu informashon ainda.