KRALENDIJK- Djadumingu, dia 3 di òktober Zhaeva, Yadin i Dinan a pasa un dia tremendo na aeropuerto Flamingo di Boneiru.

E dia a kuminsá 10 or di mainta, ora a risibí nan na kazèrne di e kuerpo di bomber. Despues di a pasa riba tereno di e bomberonan, a subi den un ‘crash tender’ pa ekseperensiá kon esaki ta. Nan a haña chèns tambe pa purba paga kandela.

Na restorant di aeropuerto e muchanan a haña koi bebe ku un pastechi, i despues a pasa ku e muchanan na diferente parti di aeropuerto. E muchanan por a pisa nan mes na lugá di chèkin maleta, a skèn un tas na departamentu di siguridat i a kontrolá nan pasport na departamentu di imigrashon.

Buelo

Despues di nan keiru na aeropuerto, tabata tempu pa a hasi un buelo. Capitan Nigel, di fundashon Hoogvliegers, a pasa ku kada un di e muchanan riba e isla, promé ku a baha bèk na tera. E muchanan ku tabata na tera durante e buelonan, a yuda personal di BIA hasi un chekeo di e pista.

E tabata un dia hopi interesante pa e muchanan. Ta yama danki nan tur ku a yuda hasi e dia pa e muchanan aki un dia inolvidabel, entre otro kuerpo di bombero, personal di BIA i tambe tur esnan ku ta duna sosten na e fundashon Hoogvliegers.