KRALENDIJK – E ofisina di benta di Corendon na Boneiru a sera mas ku un aña despues di e apertura festivo. Esei bosero Norman Serphos ta konfirmá. E ofisina a habri 15 di yanüari 2025, pero den práktika a resultá ku e no a kumpli ku e espektativanan.
Segun Serphos a tuma e desishon despues di konsulta interno. “Asina ta ku despues di hopi deliberashon interno a disidí pa sera e agensia di biahe na Boneiru. For di inisio nos a ripará ku nos klientenan ta preferá di buk nan biahe via nos website. Ta evitá hopi biaha un bishita na nos ofisina físiko,” segun e bosero.
Ounke a sera e ofisina, Corendon ta enfatisá ku servisio ta keda disponibel pa klientenan na Boneiru. “Nos ta keda aksesibel via telefon, WhatsApp i e-mail pa personanan ku ta preferá kontakto personal,” Serphos ta bisa.
No a plania un lokalidat nobo
Riba e pregunta ku tin plan pa habri un ofisina nobo na un otro lokalidat riba e isla, Serphos ta bon kla: “Apsolutamente ku nò.” Ku esei ta parse ku por lo pronto un presensia físiko di Corendon na Boneiru ta definitivamente pasado.
Buelonan ta keda sin kambio
Seramentu di e ofisina di benta no tin konsekuensia pa e demanda di buelo. Corendon ta keda bula pa Boneiru. “E buelonan ta sigui normal. E demanda pa Boneiru ta keda haltu i e destinashon ta bon, segun Serphos.