KRALENDIJK – Konsehal i lider di frakshon di UPB, Benito Dirksz, a ekspresá su mes tokante sierto divishon riba medionan sosial tokante di nombramento di e diputadonan nobo. Segun Dirksz, un parti di e krítika, spesialmente dirigí riba na diputado Jennifer Mohamedjoenoes, ta basá riba malinformashon i un imágen inkorekto.
Entre otro a wòrdu sugeri ku Mohamedjoenoes no tin sufisiente konekshon ku Boneiru òf ku e no ta aptu pa e funshon. Dirksz ta nenga esaki i ta bisa ku Mohamedjoenoes ta biba na Boneiru, i ku e tin hopi eksperensia den e sektor finansiero den e région.
E ta suprayá ku e tres diputadonan nobo – Mohamedjoenoes, Joselito Statia i Timoteo Silberie – a wòrdu skohí konsientamente pa e frakshonnan di koalishon basá riba nan profesionalismo i konfiansa.
Duna espasio
Dirksz ta hasi un yamada na komunidat pa duna e kolegio ehekutivo e espaxsio nesesario pa por trata. “Awor ta na nos tur huntu pa duna Kolegio Ehekutivo e espasio nesesario pa nan por traha pa Boneiru’, asina Dirksz a konkluí.