WILLEMSTAD – Den e Instituto Hudisial pa Hubentut Kòrsou (JJIC) a surgi di nobo inkietut despues ku un grupo di hóben a lanta i vários menor di edat a sa di hui for di e instituto. Segun e hóbennan por papia di kondishonnan di bida inhumano.
E inkietut a kuminsá den oranan di anochi, ora un grupo di hóben a resistí i a kuminsá protestá. Segun Èxtra hóbennan lo a kore sali bai tambe for di e instituto. Segun personanan involukrá ta trata di na tur mas ku djes menor di edat ku a hui.
Durante e disturbio e hóbennan tabata grita ku durante dia nan ta haña insufisiente i mal kuminda. Por ehèmpel ta papia di pan bieu i dañá. Tambe nan ta keha di skarsedat di fasilidatnan básiko manera papel di wc i habon. Muchanan muhé den e instituto ta bisa ku fuera di esei nan no ta risibí kotèks.
Mayornan a reuní dilanti di e instituto pa wak kiko ta pasando, pero no a pèrmití nan drenta pa papia ku nan yunan. Algun mayor ta bisa ku despues a puntra nan pa nan mes trese artíkulonan manera papel di wc.