KRALENDIJK – Direktorado di Supervishon i Mantenshon di Lei ta mira bèk ku satisfakshon riba e periodo di kampamentu 2026 na Boneiru, ku a tuma lugá for di 29 di mart te ku 8 di aprel. Durante e periodo akí, kampamentu tabata pèrmití na e sitionan indiká riba tereno públiko. Supervishon riba kumplimentu ku e reglanan a tuma lugá aktivamente.
Durante e periodo di kampamentu Direktorado di Supervishon i Mantenshon di Lei a traha huntu ku Kuerpo Polisial Hulanda Karibense (KPCN), STINAPA Boneiru, Koninklijke Marechausse (KMAR) i Selibon NV. Huntu nan a tene supervishon na tur e sitionan públiko di kampamentu. Donkey Beach i Te Amo Beach tabata e dos hòtspòtnan kaminda mayoria hende a kampa.
E periodo di kampamentu a kana bon i trankil, sin violashon òf insidente. Direktorado di Supervishon i Mantenshon di Lei ta ekspresá su apresio i kòmplimènt na tur hende ku a kampa pa e manera ku nan a kumpli ku e reglanan i pa nan komportashon responsabel. Esaki a kontribuí na un ambiente seif i plasentero na e sitionan di kampamentu.
Kumplimentu ku regla ta keda importante pa protehá naturalesa, salbaguardiá siguridat i mantené habitabilidat pa nos habitantenan i bishitantenan. E resultadonan positivo akí ta un muestra ku bon kolaborashon i palabrashonnan klarito ta funshoná.
Direktorado di Supervishon i Mantenshon di Lei, huntu ku su partnernan, ta sigui komprometé nan mes pa un komunidat limpi, seif i habitabel na Boneiru.