Kralendijk- Ta notando un kresementu den interes di hende na Boneiru pa bakuná nan mes. Entre djabièrnè anochi i djaluna anochi no ménos ku 1349 hende a registrá pa bakunashon.

Lógikamente esaki tin di haber tambe ku e echo ku a habri registrashon awor pa tur hende for di 18 aña. Te asina leu solamente hendenan riba 60 i hende ku algun kondishon médiko por a registrá.

Djaluna a sera ku un total di 363 hende ku a keda bakuná, di kual 221 a pasa e promé angua i 142 a pasa esun di dos.

Awe den parti mainta tabata tin algu di aglomerashon dilanti di kompleho deportivo Jorge Nicolaas, pero atardi ya tur kos tabata hopi trankil.

Positivo

Hopi di esnan ku a bakuná djaluna tabata tin komentario positivo. “Mi no a sinti nada di e angua”, asina un persona ku a kaba di bakuná a konta AworBonaire. Tambe hopi hende ta positivo tokante e echo ku e organisashon na e lugar di bakunashon ta bon, i ku tur kos ta kana hopi ‘smooth’.