WILLEMSTAD- Despues di a finalisá ku éksito un estudio di un aña, djabièrnè último binti aspirant a risibí nan sertifikado i diploma di agente Polisial Ekstraordinario (BAVPOL), for di man di Direktor di Wardakosta di Karibe Hulandes, Frank Boots i Alpha Falbru, Direktora di ‘Opleidingsinstituut Rechtshandhaving en Veiligheidszorg (ORV).

E aspirantnan a risibí e diploma i sertifikado durante un seremonia na Marinebasis Parera. Awor e aspirantnan ta agente di Wardakosta kompletamente desaroyá i establesé i nan ta bai reforsá e basenan di Wardakosta na Kòrsou, Sint Maarten i Aruba.

E aspirantnan aki a kuminsá ku e estudio Básiko di Wardakosta, e ‘Basis Opleiding Kustwacht’ (BOK) na ougùstùs 2021. Durante e kuater simannan despues nan a risibí nan formashon. E asina yamá periodo ‘Samen Sterk’ durante kua nan a keda di tèst tantu mental komo fisikamente. Despues di e simannan di formashon a kuminsá e sobrá di e formashon BOK i entre otro nan a risibí lèsnan básiko di habilidat di tiru, habilidat nóutiko, habilidat di temanan hurídiko i prosidimentunan di embarke. E aspirantnan a haña bastante retonan físiko, mental i teorétiko i awor ta kla pa protehá i yuda e komunidatnan.

Durante e seremonia tantu Direktor di Wardakosta, Frank Boots komo Alpha Falbru di ORV, a dirigí nan mes na e agentenan. Kasi un aña e aspirant nobo nan a antisipá e dia aki. Despues di a lucha duru i pasa periódonan largu for di kas, awor nan por selebrá nan logro. E diplomanan a yega i awor e trabou na Wardakosta por kuminsá. E agentenan nobo dentro di poko ta bai e puntonan di sosten di Wardakosta kaminda huntu ku otro agente di Wardakosta nan lo bai traha riba laman.