DEN HAAG – Si bo ta biba riba un di e islanan den Karibe bo por usa riba e sitio wèb di United Care Carribean un instrumento online pa eskoho di estudio pa bai studia algu den direkshon di kuido òf e ámbito sosial na Hulanda.

E futuro studiante di Medisina, Fisioterapia òf Trabou Sosial por haña tepnan práktiko i eksperensianan di otro studiante di Karibe òf profeshonalnan.

E ekspertonan aki ta studia òf traha kaba na Hulanda i ta konta di esei den Stories. Algun di nan a regresá ‘nan’ isla despues di nan estudio.

E sitio wèb  i e tayernan korespondiente ku ta duna riba e islanan ta un inisiativa di e fundashon edukashonal WeConnect, ku mediante esaki ke kontribuí ku informashon riba eskoho di estudio pa hóbennan di Karibe.

“Nos ta ripará ku tin nesesidat di informashon dirigí den klasnan. Nos ta yuda e alumnonan pa hasi un eskoho konsiente den e variedat  enorme di estudio na Hulanda”, mènedjer di WeConnect Tanja Fraai ta splika.

Tayernan

E aña eskolar aki ta bai kuminsá atrobe ku un seri di tayer kaminda un profeshonal den kuido ta konta di su materia, e kurso i e pashon pa bai traha den kuido òf e ámbito sosial.

Fin di novèmber e spesialista di garganta, nanishi i orea, Remi Schoop, lo duna un tayer na Radulphus College, su skol bieu. E lo trata e kambio ora el a yega Hulanda, su temporada di estudio i su trabou komo dòkter.

Práktiko

Riba e sitio wèb bo por haña plannan di estudio pa estudionan riba nivel di MBO, HBO i WO na Hulanda. Riba e página Tips studiantenan por mira unda nan por trein studia (online).

Stories

Banda di esei e parti di Stories ta popular; akinan studiante- i profeshonalnan di Karibe ta konta storianan di nan ámbito di kuido. Por lesa por ehpel storianan di Anouk van den Berg di Hulanda, Joanne Ignacio di Boneiru i Phylserie Magdalena di Kòrsou i hopi mas.

Por haña mas informashon di programanan di formashon den kuido i riba tereno sosial riba e sitio wèb WeConnect, ku ta spesialmente diseñá pa studiantenan Antiano i Arubano: www.unitedcarecaribbean.com.