KRALENDIJK – Pa motibu di molèster ekstremo di awa i e konsekuensianan di esaki, riba djamars 8 di novèmber Fundashon Mariadal tabata habrí solamente pa kasonan di emergensia. Tabatin un eksepshon riba esaki pa pashèntnan pa tratamentu durante dia, pa operashon i pa kasonan di emergensia. E situashon akí ta keda na vigor te un próksimo aviso.

Poliklínika

A posponé e sitanan pa e poliklínikanan i a yama e pashèntnan i e klientenan ku tabatin un sita pa traha un sita nobo. Mariadal ta sigui vigilá e situashon, tambe relashoná ku eventual yobida nobo.

Operashon

A redusí e kantidat di operashon. Solamente operashonnan di emergensia a tuma lugá.

Ka’i Mimina

Pa motibu di hopi molèster di awa a disidí pa sera Ka’i Mimina riba djárason 9 di novèmber. Via telefòn a pone e klientenan na altura di esaki. Na momentu ku e molèster di awa bira ménos i e edifisio ta aksesibel atrobe, Mariadal ta notifiká ku Ka’i Mimina por habri atrobe pa bishitantenan durante dia.

Botika FM

En prinsipio e botikanan di Fundashon Mariadal ta habrí i operashonal. Na Botika FM tin molèster di awa pafó di e edifisio, loke ta difikultá akseso na e botika. Pa e motibu akí Mariadal ta konsehá pa riba djárason 9 di novèmber bai un otro botika si e molèster di awa kontinuá. Tin eksepshon pa kasonan di emergensia. Si bo tin pregunta òf duda tokante bo remedinan, bo por tuma kontakto ku nos na e numbernan di telefòn (+599) 715 – 8905 i (+599)  715 8900 ekstenshon 1910.

Mariadal ta vigilá e desaroyonan i lo duna informashon na momentu ku tin kambio den e situashon.