KRALENDIJK – Ministerio di Salubridat, Bienestar i Deporte (VWS) riba 22 di novèmber a inisiá un konsulta via internèt tokante e Desishon sosten sosial i kombatimentu di violensia doméstiko i maltrato di mucha BES proponé. 

Na e momentunan akí no tin regulashon tokante ayudo i sosten pa personanan ku un malesa, limitashon òf grandinan ku ta biba na kas. Tampoko no ta eksistí regulashon relashoná ku kombatimentu di violensia doméstiko i maltrato di mucha. Direktorado di programa Kuido i Hubentut Hulanda Karibense (ZJCN) di ministerio di VWS último tempu a sera akuerdo ku e entidatnan públiko i organisashonnan enbolbí pa regla esaki bon na Hulanda Karibense. 

Pa medio di e konsulta via internèt tur hende por duna sugerensia pa mehorá e regulashon akí. E intenshon ta pa laga e desishon (proponé) drenta na vigor riba promé di yanüari 2024.

Sosten sosial

Ta formulá reglanan pa sosten sosial pa habitantenan di Hulanda Karibense ku un malesa òf limitashon i grandinan ku ta biba na kas. E meta ta pa nan por keda biba mas tantu posibel riba nan mes na kas i por partisipá adekuadamente den sosiedat. Por ehèmpel ofresiendo aktividatnan durante dia òf guia. 

Violensia doméstiko i maltrato di mucha

E desishon proponé ta regla mas aleu ku na momentu ku tin señal di violensia doméstiko i maltrato di mucha, siudadano- i profeshonalnan por akudí serka un punto di konseho i denunsia violensia doméstiko i maltrato di mucha, manera e punto di konseho i denunsia Guiami na Bonaire. Ta ankra tareanan di e punto di konseho i denunsia legalmente tambe den e desishon. Ademas profeshonalnan tin e derechi pa, kaminda ta nesesario kibrando ku nan sekresia profeshonal, hasi un denunsiá na e punto di konseho i denunsia akí. Tambe ta obligá sierto organisashonnan, manera hustisia, enseñansa, akohida di mucha i ofresedónan di kuido, pa stipulá un kódigo di protekshon violensia doméstiko i maltrato di mucha. Un kódigo di protekshon asina ta yuda profeshonalnan pa tuma pasonan, si durante nan trabou nan mira señalnan di violensia doméstiko i maltrato di mucha. 

Reakshoná

Bo por reakshoná riba e desishon proponé (e Algemene Maatregel van Bestuur) via e konsulta via internèt te ku 9 di yanüari 2023: Overheid.nl | Consultatie Besluit maatschappelijke ondersteuning en bestrijding huiselijk geweld en kindermishandeling BES (internetconsultatie.nl)