KRALENDIJK – Komunidat di skol Bonaire djabierne awor ta organisá un evento rondó di e asina ‘purple friday’ ku ta pidi atenshon pa akseptashon di hende ku un orientashon diferente òf un otro identidat di sekso for di esun ku nan a nase kune.

E Purple Friday originá na ehèmpel di Spirit Day na Estadonan Uní di Merka, ku a tuma lugá pa promé biaha den 2010 komo un ekspreshon kontra tentamentu di hóbennan lhbt.

“SGB, komo skol inklusivo , ta opiná ku ta importante pa kada alumno/studiante por ta su mes i ku no ta pèster e debí na su orientashon. Pa e motibu ei djabièrnè próksimo alumno-/studiantenan por mustra nan solidaridat ku lhbt+”, asina direktora SGB, Klaske Apperloo a skibi den un komunikado di prensa djaweps.

Komo sugerensia di ekspereshon di akseptashon di inklusividat, ta pidi e hóbennan pa

• bisti koló lila na skol,
• pega un steker ‘One Love’ (ku lo parti grátis),
• rushi/pinta uña lila, 
• òf pone un prent di dùim i/òf un lema/mensahe riba un poster spesial trahá pa e okashon.