KRALENDIJK – Atlétiko Tera Cora(ATC) fin di siman pasá, a organisá un aktividat pa klousura aña 2022. Un kantidat di mucha tabata kore bai bin riba e vèlt na e sitio, disfrutando di e anochi. Nan tabata hunga diferente wega i boncer ku tabatin na e lugá. 

Tambe tabata presente konosido siudadano Ibi Seraus i su esposa. Salomon Clarinda, tambe tabata presente, ta algun di e proménan ku a skòp bala riba e tereno den pasado. Awendia konosí pa vèlt di ATC, un fasilidat moderno pa e deporte. Tin algun hende ta bisa, vèlt di Ibi.

Na e okashon, Aaron Martis, presidente di ACT, a dirigí palabra na esnan presente. “Apesar ku durante e aña aki algu desastroso a sosodé na e vèlt (e kandela ku tabatin), e aña a bai bon pa e organisashon. Nos ta rekuperando di loke a sosodé, pa sigui riba e desaroyo pa mihó. Spera boso tin un bon kambio di aña, pa nos kontinuá na bienestar di e muchanan.” 

Vèlt

Luty Balentin, presidente di “Federashon Futbòl Boneriano (FFB), a ekspresá kon kontentu e ta, mirando e bon desaroyo ku tin na vèlt ATC. “Mi ta  kontentu ku ATC su moveshonnan den e mundu di futbòl. Nan tin hopi mucha ta praktiká e deporte di futbòl, esei ta nifiká ku mester tin hopi lider pa por guia tur e muchanan. Manera mi ta mira, ta trata di mucha hòmber i muhé ta aktivo riba vèlt, den desaroyo pa loke ta bon pa nan futuro. Tur klase di éksito pa e aña binidero. Sigui ku e bon trabou.”