KRALENDIJK- Djárason 14 di desèmber anochi, hóbennan di Liseo Boneriano, sekshon HAVO, MAVO i VWO a presentá nan profielwerkstuk. Hopi hende tabata riba tereno di skol e anochi pa tuma nota loke e hóbennan tabatin prepará. 

Nan a hasi nan esfuerso i a presentá bunita obra, loke nan a prepará pe durante henter aña eskolar. Sidney Martijn, dosente di ekonomia i Geografia na HAVO i VWO na Liseo Boneriano, a splika tokante e aktividat. 

“Awe e hóbennan ku ta den eksámen klas, a presentá nan profielwerkstuk. Ta trata di un tarea ku e hóben tin, momentu e ta bai finalisá e skol. Nan ta hasi un tema ku ta kai den nan profil, manera: ekonomia, kuido, kultura, naturalesa, téknika. Ta dependé kua nan a skohe, nan ta bai ku un tema i ami komo dosente ta guia nan ku ta traha i presentá tarea. Awe nan ta presentá nan  konklushon di nan investigashon”, asina Martijn a splika. 

Meta

E tópiko tabata di Cargill. Meta di e aktividat ta, debí ku e hóben nan ta bai  studia afó, e mester hasi diferente di e proyekto manera esun di awe. Di e manera aki nan ta prepará pa momentu nan topa e situashon i nan ta siña traha den grupo.

Hopi hende tabatin bon komentario di loke nan a mira serka e hóbennan i e manera ku a presentá nan produkto na esnan presente.