RINCON – Djaluna mèrdia a tuma lugá apertura ofisial di e parke Jantjebeton. E parke ta pegá ku Kolegio Luis Beltran na Rincon. E projekto a keda diseñá pa arkitekto Bo Bodifee. 

Na e okashon, promé ku un di e muchanan presente a kòrta sinta, algun persona a papia. Direktora di Komunidat i Kuido, Silvana Serfilia, a papia tokante tur esnan ku a hasi e proyekto posibel.  

“Hungamentu di e muchanan ta perfekto pa nan desaroyo. E parke aki ta un bon sitio pa enkuentro loke ta importante pa kada bario. Sigur danki pa tur ku a kontribuí pa e parke ta kla pa por hasi uzo di dje” asina Regeline Sambo, Representante di ministerionan di VWS, asuntunan di bienestar, salubridat, bienestar i deporte a bisa

“P’ami tur mucha ta importante i nan meresé sea yudansa for di Hulanda òf Boneiru, no ta importá. Ta bai tin mas parke pa mucha ku ya ta den proseso  pa inisiá i finalisá. Tur mucha mester por hunga pafó di kas den bario, di e manera aki, nan ta siña dil ku otro i sosialisá”, Dave Ensberg, direktor di Jantjebeton a bisa. 

Traha Huntu

Diputado James Kroon tambe a hiba palabra. “Di e manera aki nos ta mustra ku huntu nos por logra. Diferente trabou huntu ku VWS OLB i Jantjebeton, awor a logra un parke mas den Rincon. E parti di un pisina tambe ta den proseso i algun proyekto mas. E muchanan di Rincon a haña algu mas. Nan tin algun vèlt den e área aki i pronto stadion ta bai haña un kara nobo”, asina Kroon a bisa.