DEN HAAG – E Tim di Reino Hulandes ta presente na luna di mart na World Baseball Classic. Direktor Hensley ‘Bam Bam’ Meulens i su ekipo a traha na e selekshon preliminar di sinkuenta persona i a divulgá algun nòmber riba e lista. Super estreanan di Liga Mayó manera Xander Bogaerts i Kenley Jansen ta riba e roster.

E selekshon preliminar di Tim di Reino Hulandes, ku a alkansá semifinal den e promé dos edishonnan, tin tambe partisipantenan na Liga Mayó di awor manera agente liber den outfield Jurickson Profar, infield di Detroit Tigers Jonathan Schoop, kècher di Atlanta Braves Chadwick Tromp i agentenan liber den infield Didi Gregorius i Andrelton Simmons.

Ozzie Albies, e estrea di segundo base di Atlanta Braves, ta rekuperando ainda di un leshon na final di e temporada i lo no partisipá ku e tim pa WBC

Banda di e nòmbernan konosí Meulens tin tambe dos hungadó ku eksperensia di Liga Mayó. E rumannan Joshua i Richie Palacios, ku a nase i lanta den Brooklyn, a debutá e último temporadanan den MLB i ta bini na remarke pa hunga pa e Tim di Reino Hulandes ya ku nan mama ta di Kòrsou.

Wladimier Balentien, ku a sobresalí den World baseball Classic 2017 i ku últimamente a hunga den Mexican Winter League, a kometé su mes kaba pa partisipá na World Baseball Classic. Méskos ku Pedro Strop, ku den un edishon anterior a tira pa Repúblika Dominikana, pero tambe ta outorisá pa hunga pa Reino.

Perspektiva talento tòp

Ku Ceddanne Rafaela Meulens a añadi un di e talentonan mas grandi di Reino i beisbòl profeshonal na e selekshon preliminar. Rafaela ta un talento tòp den e organisashon di Boston Red Sox i na 2022 nan a skoh’é komo Minor League Player of the Year.

E Yu di Kòrsou, ku ta hunga tantu shòrtstòp komo medio kampo, a laga un bon impreshon atras serka e tim durante e Serinan di Reino, un kampo di entrenamentu mini na Kòrsou den luna di novèmber promé ku WBC.

Méskos ku den edishonnan anterior e Liga Mayó di Beisbòl, e kompetensia di mas haltu na Hulanda, lo mira representantenan riba e roster. E anterior picher di Liga Mayó Shairon Martis (Curaçao Neptunus) i Lars Huijer (HCAW) tabata dos di e mihó pichernan inisial den Liga Mayó e ultimo dos añanan i nan nòmber tambe ta riba e roster preliminar.