KRALENDIJK—Djabièrnè a kuminsá ku ponementu di yerba den stadion Antonio Trenidad na Rincon. 

Diputado James Kroon tabata presente i a duna algun splikashon tokante e trabounan. “Trabounan ta kana bon i nos ta na tempu pa finalisá pa e torneo por kuminsá dia 28 di mart 2023. Ta trata di wega interinsular ku ta bai tuma lugá na Boneiru. Dia 25 tin un enkuentro pafó di Boneiru, pero pa 28 di mart, e promé wega ta tuma lugá na Boneiru na Rincon den stadion Antonio Trenidad”. 

Segun e diputado di Deporte, mester bai drecha i adaptá e lusnan pa nan ta mas kla ku ta e kaso awor. Kroon a splika tambe ku e tipo di yerba ku ta bai pone awor ta un tipo di yerba di kalidat hopi bon. 

Regla

“Un bes aki por bisa ku e vèlt aki ta esun ku e mihó kalidat di yerba na Boneiru”, segun Kroon a bisa. E trabounan pa ponementu di e yerba nobo lo tuma masomenos un luna di tempu. Segun Kroon a sigui splika tambe ku mester a tuma hopi regla di FIFA na kuenta, pa e vèlt ta aprobá pa weganan internashonal, ku por wòrdu hungá na Boneiru.