KRALENDIJK- Luiginio ‘Luis Moka’ Molina, a bai ku e korona komo Rei di tumba grandi 2023. E aktividat a tuma lugá djasabra anochi na Social Cafe. ‘E aña’ki si’, ta título di e tumba ku Moka a kanta.

Su kompositor ta, Natanael ‘Nati’ Melaan, kende a gana komo kompositor grandi i chikitu den festival di tumba. Semi Marten, na apertura di e parti di festival di tumba grandi, a pone tur hende saka nan lenga promé ku tumbanan a kuminsá zona.

Na e momentu ei, áwaseru a kuminsá spat i menasa pa kai. Esei a pèrkurá pa basta hende na kareda pa skonde pa áwaseru.

Payola, a presentá 2 tumba i Happy Band a presentá 3 tumba e anochi ei. Tur tabata bon tumba loke por a tende di e komentarionan den públiko i esnan riba esenario. Simplemente Moka, tabatin e chèri riba e bolo.