KRALENDIJK – Dia 6 di febrüari último UNKOBON a dirihí un karta na e 6 kabesantenan di lista di e partidonan polítiko ku ta bai partisipá na e elekshon benidero. Den e karta aki UNKOBON a pidi e kabesantenan di lista pa duna un kontesta kla riba e siguiente dos pregunta:

1. Bo partido tambe ta di opinion ku riba un término kortiku mester fiha un minimo soshal pa e habitantenan di Boneiru di kual por kubri e gastonan minimo di kosto di bida?                Kontesta  si / no
2. Bo partido ta apoyá UNKOBON polítikamente den e kaso hudisial kontra estado Hulandes pa fiha un minimo soshal real?                                                                                                                             Kontesta  si / no

Tur seis partido polítiko a reakshoná riba e petishon di UNKOBON. Tur seis partido a kontestá ambos pregunta ku si.

Minimo soshal

Minimo soshal ta e montante minimo ku un hende mester pa kubri su kosto di bida. Pa kasi tur habitante di Hulanda tin un minimo soshal fihá. Boneiru pa mas ku 12 aña ta parti di Hulanda. Apesar di esei ainda no a fiha un minimo soshal pa Boneiru. Konsekuentemente mas o menos 40% di e habitantenan di Boneiru ta biba den pobresa

Tur partido por a duna un aklarashon kòrtiku di nan kontesta. A kontinuashon esnan mas importante

MPB

MPB ta pará kompletamente tras di e punta di bista ku gobiernu mester fiha mas pronto posibel un minimo soshal pa e habitantenan di Boneiru. Pobresa na Boneiru no ta aseptabel i no por kontinuá dje forma aki.

MPB lo apresiá ku dia promé di Yüli awó, dia ku ta rekòrdá esklavitut, Gabinete Hulandes anunsiá e desishon tokante fihamentu di e minimo soshal. Kada ken den Reino tin derecho riba un bida igual i humano. Komo tal MPB ta sostené meta di e kaso hudisial di Unkobon, ku si un desishon pa fiha un minimo soshal no keda tumá, pa laga wes dekretá esaki.

PDB:

Nos ta proponente fervente pa stipulá por inmidiato na un mínimo sosial hustu pa Bonaire.

Pero nos ta kere ku stipula un mínimo sosial so, nos NO lo yega, debi ku subida di entrada so lo efektua un impakto di inflashon ku konsekuensia kontra produktivo pa netamente e grupo ku kier yuda.

P’e motibu ei, fuera di stipula un mínimo sosial, nos ta kere ku nos gobièrnu lokal mester traha dirigí pa baha gastu di nos siudadano nan.

UPB

UPB ta sostene i balora tur e trabounan ku UNKOBON a bin ta hasi pa Boneiru. UPB lo sigui sostene tambe e lucha di UNKOBON i Boneiru pa yega na desaroyo soshal hustu pa un i tur ku ta biba na Boneiru. Pues spesifikamente nos ta sostene tambe e lucha pa e Minimo Soshal hustu. Kontesta riba tantu pregunta 1 i 2 ta “SI”.

M21

Nos tin tur derecho meskos ku e otro munisipionan. Nos lo ke agregá ku diferensiashon ta possibel, pero esaki mester ta semper positivo pa nos islanan. Nos ta sumamente motivá ku tin un organisashon priva ku tambe yuda bringa pa e meta aki.

1 UNION  PA  PUEBLO

Diffirente rapportnan traha dór di diffirente instansha-nan a pruebá i konfirmá e problema agudo aki. I també tur e rapportnan a indiká bon klá ku e minimo soshal real tin ku subí pa asina e konsumidó por tin un bida normal aki na Boneiru. Nos ta di opinion ku e resultado i rekomendashon nan di e rapportnan di investigashon nan mester wordu ehekuta i subí e minimo soshal real.

1 Union Pa Pueblo apoyá UNKOBON polítikamenté den e kaso hudisial kontra estado Hulandes pa fiha un minimo soshal real.

URB

URB tambe ta di opinion ku riba un término kòrtiku mester fiha un mínimo sosial pa e habitantenan di Boneiru. No fiha so, si no ehekutá esaki i sigur mas pronto ku ta posibel.

Tin sigur 3 rapport ku a investigá i evaluá e partinan aki kaba pues no mester di mas investigashon ni mas evaluashon si no ehekushon.