KRALENDIJK- Dia 9 di mart, ta un dia spesial pa hendenan ku ta dialisá, ta dia di nir. Den kuadro di e dia aki, e deportamentu di nir na Fundashon Mariadal, ta organisá un dia habri. Durante e dia, parti mainta, tur hende ku presentá na hospital, tin oportunidat pa hasi diferente tèst. 

Merychen Trenidad Dijkhoff, Dialyseverpleegkundige na Fundashon Mariadal, a menshoná algun punto relashoná ku dia internashonal di nir. 

“Nos departamentu ta funshoná bon i por nota un kantidat di kliente kresiente. Ta duna konsehonan pa evitá ku e hende ta yega na e situashon ku e mester dialisá. Transplante di nir tambe ta kana bon, esei ta sosodé na Hulanda. Aktualmente tin un 20 hende ku ta riba lista sperando un posibel transplante di nir”.

“Djaweps awor, nos tin un dia habri i tur hende por pasa hasi diferente tèst i e internista por papia tokante kada persona nan situashon. Ta importante pa kome mas saludabel posibel, pa nos tin un bida salu. Movementu ta e otro faktor den bida, ku ta yuda evitá tur malesa. Un tratamentu di dialisá no ta fásil. E ta rekerí hopi energia di e hende. Ta dependé kua tratamentu nan ta”, asina Hershal Henriette di e departamentu di dialisis a splika. 

Suku i preshon

Djaweps esnan ku ta pasa por chèk entre otro suku i preshon i mas durante e mainta. For di 8:30 mainta dia 9 binidero, por pasa na e entrada di Fundashon Mariadal. Djis despues di drenta na e porta prinsipal, por mira esnan ku ta hasi tèst e mainta. E tèstnan ta dura te 11:30 di mèrdia.