KRALENDIJK- Djaluna mainta grupo di persona a presentá na Boka Onima, pa e firmamentu di dokumentu, pa kuminsá ku trabounan pa e flur pa ponementu di fever.  

“Nos ta pará awe na un gran dia. Simbólikamente ta bai krea fasilidat pa e deporte di pustamentu ku outo, motosaikel i otro vehíkulonan.  Awor despues di hopi a spera, awe ta bai kuminsá prepará pa traha e pista pa ponementu di fever. Ta gradisí tur e instansianan enbolbí, diputado James Kroon, kende a karga e proyekto”, asina Timoteo Silberie, hefe di deportamentu di edukashon i bienestar a bisa. 

“Hende lo puntra, dikon nèt awe? Mi tin 8 luna ta traha riba e proyekto aki. Mi ta gradisí BC pa kontribuí pa e proyekto aki ta kla pa awor por inisiá ku e trabounan.  Danki na Din Bernabela i Gerald Silberie, kendenan a hasi hopi esfuerso pa e proyekto ta kla. No tabata fásil. Mester a tene kuenta ku hopi kos. P’esei no por a sigui ku e plan ku tabatin, pa krea e fasilidat na subi kolombia. Danki tambe na Fittipaldi i laurence ‘Louchi’Cicilia, kendenan a  keda pusha pa yega na e fasilidat pa e deporte di spit. Tambe mi ta mira algun di esnan ku a kuminsá den pasado ku e idea pa yega na pista  pa dragrace, entre otro Henrique Winklaar. Hopi idea tabatin i a opta pa hasié via INDEBON. Pa un persona partikular atendé ku e proyekto aki, e sistema ku kosnan ta awendia, pèrmit i diferente otro kos ku mester tene kuenta kuné, e lo tabata imposible” asina diputado Kroon a splika.    

Bunita proyekto

Martijn Zwiers di BWM, ta e kompania ku ta bai hasi e trabou i el a bisa: “Nos ta bai ehekutá e bunita proyekto. Ta bai hasi e flur di asfalt, den un área será i pone vangreil den sierto área pa loke ta trata seguridat. E parti na e banda di laman, ta bira e sitio pa stashoná outo pa wak e aktividat. Ta bai sigui rosa e mondi pa e parti pista di dragrace ku ta bin pega na loke ta bai konstruí awor. Mas o ménos 5 siman ta realisá e trabou. Promé ku esei tin kosnan ku mester atendé pa por hasi e trabou, esta material i midimentu.”

Despues a sigui e parti di firmamentu i diputado Kroon, a subi mashin, pa kuminsá rosa e parti kaminda e pista di dragrace ta bin.