KRALENDIJK – Pa mehorá kalidat di kuido a organisá resientemente un kurso pa asistentenan di dòkter di e klínikanan di dòkternan di kas na Boneiru. E asistentenan di dòkter ta bai puntra e pashènt awor kiko su kehonan di salú ta na momento ku nan ke traha un sita. Asina e asistente por evaluá si por ehèmpel por papia di un urgensia. Òf podisé e asistente mes por duna un bon konseho i e pashènt no tin mester di bini dòkter spesial. Asina e pashènt ta haña e kuido adekuá na e momento adekuá.

E método aki pa evaluá sistemátikamente e nesesidat di pashèntnan ta konosí komo triage. E kurso aki pa asistentenan di dòkter na Boneiru tabata na enkargo di Omaira Nicolaas, un triagista eksperensiá di Primary Care Carribean. Riba petishon di e dòkternan di kas Nicolaas a kompartí su konosementu i eksperensia.

Dr. Adrienn Vegh, un dòkter di kas, a suprayá e importansia di triage den klínika di dòkternan di kas. “Ta di sumo importansia ku nos no ta pèrdè kehonan di pashèntnan. Ta p’esei e puntramentu kuidasoso di e kehonan di e pashènt ta di gran importansia. Formashon riba e tereno aki ta esensial pa e kalidat di kuido. Ademas formashon ta stimulá e entusiasmo pa traha huntu na mihó kuido dentro di e klínika. Ta pa e motibu ei mi tambe a tuma parti na e kurso,” Dr Vegh ta bisa.

Na final di e kurso e asistentenan di dòkter a haña un sertifikado. Mirando e desaroyonan rápido den salubridat tin mas kursonan importante planiá e próksimo temporada pa profeshonalnan den kuido. E motivashon positivo di e dunadónan di kuido den e klínika di dòkternan di kas pa partisipá na e profeshonalisashon aki ta hopi alentador.