KRALENDIJK – E sùrfdó di djestres aña di Boneiru, Bobbi-Lynn de Jong, a partisipá na un kompetensia di ‘slalom’ di Professional Windsurfers Association (PWA) na Fuerteventura. Ku esaki e ta e partisipante di mas hóben ku a yega di partisipá. El a optené un di nuebe lugá i ku e logro aki e ta pertenesé for di awor na e djes mihó  sùrfdónan femenino.

Bobbi-Lynn de Jong no ta solamente e partisipante mas hóben ku a yega di partisipá na un kompetensia di ‘slalom’, e ta tambe e úniko hende muhé prosedente di Boneiru ku a partisipá na semehante kompetensia den e último djes añanan. Partisipá na un kompetensia pa un kopa mundial pa adulto na Fuerteventura, un di e Islanan Kanario, tabata un soño p’e ku a bira realidat.

E kondishonnan bou di kua a sùrf riba e isla Spañó no tabata di kompará ku esunnan na Boneiru. Bientu duru te asta 35 nudo (un forsa di bientu 8), olanan haltu i velosidatnan haltu. “Na komienso mi tabatin miedu si. Asta e bela di mas chikitu tabata bon mirá muchu grandi pa e sirkumstansianan aki”, segun Bobbi-Lynn. Sinembargo a bai bon segun e, mihó ku a spera. “E hendenan muhé adulto tabatin masoménos e mésun midí di bela ku mi. Na komienso nan tabata puntra nan mes si kiko mi tabata hasi einan, pero despues nan a bira hopi kariñoso.”

‘Wildcard’

En realidat Bobbi-Lynn no tataba ètòl riba e lista di komienso pa e kompetensianan ku a tuma lugá di 27 di yüli pa 5 di ougùstùs na Fuerteventura. Sinembargo e no kier a laga e chèns aki pasa asina asina. El a entregá un asina yamá ‘wildcard’ (un karchi di entrada ku por pèrmití un deportista partisipá, ounke e no ta selekshoná) i djes dia promé ku e weganan a kuminsá el a risibí un meil ku e tabatin mag di partisipá. “Esei a spanta nos un tiki. Nos mester a regla tur kos ainda, kumpra pasashi i bai ku henter famia Fuerteventura”, segun e tata Jelmer de Jong.

Bobbi-Lynn a kuminsá praktiká windsùrf ora el a bin biba na Boneiru i tabatin djes aña. Segun su tata e ta hopi pashoná, ta profundisá su mes huntu kuné den e téknika i ta trein hopi. “Huntu nos ta wak hopi video ku truko i triki ku despues e por pone den práktika. Bobbi-Lynn tin un drive natural den dje pa presta optimal i por bira asta di mal humor si un dia tin muchu tiki bientu.” E ta trein duru pa despues bira kampion mundial, el a konta den e notisiero di hubentut Aleman ku a hasi filmashon na Fuerteventura.

Spònser

Su prestashonnan a yama atenshon serka un hungadó grandi riba tereno di windsùrf, Starboard. Nan ta spònser e ku e mihó plankinan i e plankinan mas nobo i e i su rumannan muhé ta pertenesé na e tim kampion Starboard. Ademas di ayudo material esaki ta nifiká tambe ku nan ta asistí nan ku konseho i partisipashon aktivo. Segun su tata tin un spònser tambe pendiente awor pa spònser e belanan. “E ora ei e plachi ta kompleto.”

PWA ta organisá tambe kompetensianan pa hubentut. Na òktober tin unu atrobe na Turkia i e weganan aki ta intenshoná pa prepará e muchanan poko poko riba e kompetensia pa adultonan. “Pero en realidat el a bula e stap ei awor”, su tata ta informá ku orguyo. “Sinembargo e ta bai partisipá na Turkia den luna di òktober pa kompetí ku muchanan di su propio edat.”

E echo ku e tin gana di bira sùrfdo profeshonal no ta nifiká ku e ta bai neglishá su skol. E ta na VWO i ta bisa ku e tin tur konfiansa ku e lo por kombiná skol i deporte bon. Segun Bobbi-Lynn esei lo no ta un estorbo na momento ku e lèsnan na skol bira mas hopi.