WILLEMSTAD- Djabièrne último aspirantnan di e estudio básiko pa bira agente di Wardakosta (Basis Opleiding Kustwacht (BOK) 2023, a marcha drenta Marinebasis Parera despues di kuater siman intensivo di entrenamentu. E 21 aspirantnan di Aruba, Kòrsou i St. Maarten kada un tin un solo meta, un karera bunita na Wardakosta. 

Durante e simannan di introdukshon e hòbennan pa kuater siman largu, bou di guia di nan instruktornan a sigui lès den klas i a eksperensha diferente kampamentu introduktorio. Durante e kampamentunan e aspirantnan a marcha basta kilometer, landa hopi, kushiná nan mes, a konstruí vlot i tambe a kompletá ehersisionan anfibio. Nan ehersisio final pa nan simannan di introdukshon a kuminsá djaweps último parti anochi. Pa e ehersisio final e aspirantnan a marcha i a rema riba laman ku destino final Marinebasis Parera riba djabièrne mainta. Na Marinebasis Parera e aspirantnan a keda risibí ku un aplouso kaluroso na entrada di parti di koleganan di Wardakosta i otro koleganan. 

Durante e seremonia Direktor di Wardakosta di karibe Hulandes, Walter Hansen a hiba un diskurso pa e aspirantnan i nan instruktornan. “Dia 14 di augustus, bosonan a kuminsa e trayektoria aki komo 21 persona individual. 10 kandidato di Aruba, 6 di Kòrsou, i 5 di Sint Maarten. Awor, 4 siman despues, mi ta mira 1 grupo, 1 unidat! Wardakosta ta un profeshon bunita, importante, i honorabel. Bo ta bisti dos pèchi: un di polis i un di marinero. Awor e otro parti di bosonan estudio ta kuminsá. Esaki ta solamente e fin di e promé fase. Tur kos ku bo siña awor, bo por usè den bo trabou den futuro. Awor bo tin e chèns pa hasi fayonan i siña for di nan. Eksito ta unikamente posibel si bo traha komo tim. Hunto nos ta fuerte! Pabien!”

Pèchi ofisial

Despues di e diskurso di e Direktor, e aspirantnan por a risibi nan pèchi ofisial di BOK, komo muestra di apresio pa nan prestashonnan durante e simannan di introdukshon. E siman aki e aspirantnan ta bai kuminsá ku e módulo básiko di habilidat, ku ta inkluí entre otro prome ousilio (EHBO) i habilidatnan di tiru, ku lo bai dura 8 siman. Wardakosta ta deseá e aspirantnan hopi éksito.