KRALENDIJK – Djadumingu 5 di novèmber, un alegria total na Aeropuerto Flamingo momentu ku e tim di beisbòl di Boneiru, kampion, a regresá kas. Ta trata di e tim di Bonaire Baseball Stars, ku a biaha siman pasá pa Repúblika Dominikana, kaminda nan a bai kompetí ku diferente pais i a sali kampion. 

Ta trata di muchanan di entre 9 pa 12 aña, apesar ku e torneo tabata pa mucha di 10 pa 12 aña. Boneiru a mustra ku apesar ku tabatin mucha di 9 aña den nan tim, nan a gana e wega final, kontra Venezuela. Ta trata di e torneo Kopa di Oro.

E coach Arys Ventura, momentu e ekipo a yega Boneiru el a bisa: “E tim a traha duru pa bon logro i a bai ku e premio mas grandi. Nos a enfrentá diferente ekipo i a duna un bon bataya te final. E partido final a bai ku hopi tenshon, pero e muchanan di Boneiru a sa di surpasá tur kos i gana e partido.” 

Respeshon

Na e tim su yegada, un kantidat di persona tabata warda e muchanan. No solamente fanátiko i famia, pero tambe un diputado i un eks diputado. Diputado Clark Abraham tabata presente i èks diputado, lider di partido MPB, Hennyson Thielman. Nan tur a saludá i saka potrèt ku e muchanan, ekspresá nan alegria di e viktoria di e muchanan.